Published on: Jan 8, 2019 – චන්ද්‍රිකා බලයට පත්වූ පසු ඩෙන්සිල් කොබ්බෑකඩුව ඝාතනය පිලිබඳව පරීක්ෂා කිරීමට කොමිසමක් පත් කළේය. එහිදී අභූත ලෙස පහල වූ රෝහිනී හතුරුසිංහ නැමති කාන්තාවක් කොමිසම ඉදිරියේ ආන්දෝලනාත්මක ප්‍රකාශ ගණනාවක් කළාය. රෝහිනීගේ බොරු සාක්ෂි වලින් කුපිත වූ ජනයා විජය විමලරත්න විරුවාගේ කිරිබත්ගොඩ ප්‍රතිමාවට පවා පහර දුන්හ . සත්‍ය හෙළිදරව්වන විට විනාශය සිදුවී හමාරය. කොමිසමේ කටයුතු අවුල් කිරීම සඳහා එම තැතැත්තිය සැලසුම් සහගතව යොදා ගත් කෙමනක් බව පසුව ඔප්පු විය.
පසු ගිය වසරේ සැප්තැම්බර් මාසයේදී දූෂණ විරෝධි බළකායේ මෙහෙයුම් අධ්‍යක්ෂක යැයි කියා කියා ගත් නාමල් කුමාර නැමැත්තෙකු එකවරම පහළ වී මාධ්‍යයට ආන්දෝලනාත්මක ප්‍රකාශ ගණනාවක් කළේය. බැලූ බැල්මට මොහුගේ වත්කම රුපියල් 1500 ක බැනර් කැබැල්ලකට ලඝු වී තිබුනද ඔහු නැටවූ බලවත් හස්තයක සෙවනැල්ල දිස්විය. හමුදාවෙන් දෙවරක් පලා ගිය නාමල් කුමාර මාධ්‍ය සංදර්ශන තියමින් රටේ අගමැතිවරයාට චෝදනා කළේය, හමුදාවේ ඉහලම ධූරන්ධරයා වූ ෆීල්ඩ් මාෂල් ෆොන්සේකාට චෝදනා කළේය.
කසිප්පු බැරලයෙන් ගොඩ ගිය නාමල්
නාමල් කුමාර අම්පාර මහඔය ප්‍රදේශයේ පුද්ගලයෙකි. හමුදාවෙන් පලා ගිය මොහු කොළඹ පැමිනියේ පෞද්ගලික ආරක්ෂක සේවාවක සිකියුරිටි රැකියාවක් කිරීමටය. සිකියුරිටි රැකියාව අතරතුර වරකාපොළ කරඳතුල්හිරිය ග්‍රාමයේ බාහිර උපාධි අපේක්ෂිත තරුණියක හා විවාහ වී එහි බින්න බැස්සේය. මහඔය ප්‍රදේශයේ විසූ නාමල් කුමාරගේ පවුලේ උදවිය වෘත්තියක් ලෙස කෙළේ කසිප්පු පෙරීමය. ඒ නිසා කසිප්පු ජාවාරම පිලිබඳව හොඳ ඉවක් නාමල්ට තිබුනේය . වරකාපොල බින්න බැසගත් නාමල් කුමාර දිගට හරහට ප්‍රදේශයේ කසිප්පු පිලිබඳව පොලීසියට ඔත්තු දුන්නේය. ඒ අතර තුර පොටක් පාදාගත් නාමල් කුමාර සිරිසේනගේ මත්ද්‍රව්‍ය නිවාරණ කාර්ය සාධක බළකායට හේත්තු වූයේය.
පොලිස්පති ඇන්ද වූ ගජබින්නය
ඉන් නොනැවතුනු ඔහු ෆේස් බුක් හරහා ‘මහසෝන් බලකාය’ සහ ‘සිංහලේ’ වැනි සංවිධාන සමග සබඳතා ඇති කරගත්තේය. ප්‍රංශයේ වෙසෙන බවට සැක කෙරෙන ‘තුෂාරන්’ නමැත්තෙක් ඔහුට හමුවන්නේ ෆේස්බුක් හරහාය. නාමල්ගේ ගජබින්නයට අනුව මුස්ලිම් අන්තවාදයට එරෙහිව සිංහල මිනිසුන් සන්නද්ධ කරන ලෙස ‘තුෂාරන්’ ඉල්ලා ඇත. ඊට අවැසි අවි ආයුධ ඔහු විසින් මෙරට නැගෙනහිර මුහුදු වෙරළට බෝට්ටුවකින් එවිය හැකි බව කියා ඇත. එම මෙහෙයුමට නැගෙනහිර පළාත් සභාවේ මන්ත්‍රීවරයකු වූ ‘පුෂ්පරාජ්’ නමැත්තා ද එක්කර ගන්නා ලෙස ඔහු පවසා ඇත. තුෂාරන්ගේ මෙම කථාව නාමල් කුමාර විසින් පටිගත කලේය
ඉන් අනතුරුව තුෂාරන්ගේ හඩපටය අතැතිව නාමල් කුමාර පොලිස්පතිවරයා හමු වීමට ගියේය. පොලිස්පතිවරයා නාමල් ත්‍රස්ත විමර්ශන කොට්ඨාසයේ නාලක ද සිල්වා වෙතට යොමු කර තිබිණි. නාමල් කුමාර හා නාලක සිල්වා අතර මිත්‍රත්වය ඇතිවන්නේ ඒ අනුවය. තුෂාරන් පිලිබදව පරීක්ෂා කළ පොලීසියට දැන ගත හැකිවූයේ නාමල් කුමාර ඇද බෑ තුෂාරන්-පුෂ්පරාජ් සහ අවි ආයුධ නාටකයක් පමනක් බවය. ඒ සමගම නාමල් කුමාර දෙකේ කොළයට වැ‍ටුනේය. නමුත් ඔහුගේ වාසනාවට හෝ අවාසනාවට පොලිස් ඔත්තුකරුවෙක් ලෙස කටයුතු කරන්නට පටන් ගත්තේය.
නාමල් කුමාරගේ වැඩ කිඩ ලැයිස්තුව
රෝහින්ග්‍යා සරණාගතයන්ට තර්ජනය කළා යයි කියවුනු අරඹේපොල රතන සාර හිමියන්, සිංහලේ සංවිධානයේ ඩෑන් ප්‍රියසාද් වැනි කිහිප දෙනෙක් පොලිසියට පාවා දුන්නේ නාමල් කුමාරය. දිගන සිංහල -මුස්ලිම් ගිනිදැල් මතුවෙත්ම මහනුවර බලා යන නාමල් නවාතැන් ගන්නේ මහසොන් අමිත්ගේ නිවසේය. අමිත්ගේ බිරිඳ පිලියෙල කළ පිට්‍ටු අනුභවකොට එහි නිදාගත් නාමල් පැය කිහිපයකින් නාලක ද සිල්වාට ඔත්තුවක් දී ඔවුන් සියල්ල පොලීසියට කො‍ටු කළේය. මහසෝන් අමිත්ලා මාස ගණනාවක් රක්ෂිත බන්ධනාගාර ගත වන අතර , එළියේ උන් නාමල් කුමාරලා අන්තර් ජාලය හරහා මැද පෙරදිගට සහ කොරියාවට අමිත්ලාගේ දුක විකුණා මුදල් ගැරුවෝය.
මරා-සිරා බඩගෝස්තර දේශපාලනයේ දඩයම් කුක්කා
එදා කොබ්බෑකඩුව කොමිසම හමුවේ රෝහිනි හතුරුසිංහ බඩගෝස්තර දේශපාලනයේ හොරනෑවක් වූයේ යම් සේද මෙදා නාමල් කුමාර මරා-සිරා බඩගෝස්තර දේශපාලනයේ දඩයම් කුක්කෙකු වූයේය. රනිල්ගේ ආන්ඩුව පෙරලීමට හේතුව ලෙස සිරිසේන කියා සිටියේ ඝාතන කුමන්ත්‍රණයකි. හැංහි හැංගි වෙස් බැඳපු උන්ගේ නියම ස්වරූපය දැන් හෙළි වී ඇත. නාමල් කුමාර යනු මරා-සිරා බල සන්නියේ නැට්‍ටුවෙක් බව අද මුලු රටටම හෙලි දරව් වී ඇත. ප්‍රභාකරන් මෙන් සැඟවී සිටි ඊනියා දූෂණ විරෝධී කෙමනේ ප්රධානියා වූ අසේල රාජපක්ෂගේ පැටිකිරියද දැන් හෙලිදරව් වී ඇත. ගෝටා හෝ සිරිසේන හෝ ඝාතන කුමන්ත්‍රනයක් පිලිබඳ කිසිම සාක්ෂියක් හොංකොං යැවූ නාමල් කුමාරගේ දුරකතනයේ තිබී නැත.
දින 52 මරා -සිරා හොර ආණ්ඩුව පැවති කාලයේදී නාමල් කුමාර හැසිරුනේ රටේ ආරක්ෂක ඇමතිවරයාටත් ඉහලිනි. ඔහු පොලීසියට උපදෙස් දුන්නේය , අපරාධ පරීක්ෂණ දෙපාර්තමේන්තුවට පරීක්ෂණ මෙහෙය විය යුතු අයුරු ඉගැන්වීමට ගියේය . දිගාමඩුලු දිස්ත්‍රික්කයෙන් පොහොට්ටු ලකුණින් ඡන්දය ඉල්ලන බව කීවේය. රටේ සමාන්‍ය පුරවැසියෙකුට අස්ගිරි – මල්වතු නායක ස්වාමීන්ලා හමුවිය නොහැකි වුවද පලතුරු වට්ටියක් අරගෙන නාමල් කුමාර එහි ද ගියේය.
නාමල් කුමාරට එරෙහි චෝදනා
නාමල් කුමාර යුද හමුදාවට සහ ගුවන් හමුදාවට බැඳී ඉන් පළා කියන පුද්ගලයකු බව අපරාධ පරීක්ෂණ දෙපාර්තමේන්තුව දැන් කොටුව මහේස්ත්‍රාත් අධිකරණයට දැනුම් දී තිබේ. යුද හමුදාවට සහ ගුවන් හමුදාවට බැඳෙද්දී ලබා දී ඇති සාමාන්‍ය පෙළ සහතිකයේ විභාගය සමත් බව සඳහන් වුවද ඔහුගේ නියම සහතික පිරික්සද්දි විෂයන් හතක් අසමත් වී විෂයන් තුනක් පමණක් සමත්වූවකු බව පෙනී ගිය බව ද රහස් පොලිසිය කරුණු වාර්තා කොට තිබේ.
බොරු සහතික ඉදිරි පත් කිරීම සහ සේවයෙන් පලා යාම යන චෝදනා වලට නාමල් කුමාර වරද කරුවෙකි. එනමුත් හමුදා නීතිය අනුව නාමල් කුමාරට පැනවිය හැකි උපරිම දන්ඩනය දින 90 සිර ද‍ඬුවමකි. තමා කළ වරදට එල්ලුම් ගස් වුවද යාමට සූදානම් යයි නාමල් කුමාර පාරම් බාන්නේ ඒනිසාය.
නමුත් නාමල් කුමාරට අච්චු කළ යුතු නියම චෝදනාව එය නොවේ. ඔහුට එරෙහිව රාජ්‍ය විරෝධී චෝදනා ගොනු කළ යුතුය. එම චෝදනාවට නාමල් කුමාර එල්ලුම් ගස් යැවිය හැකිය. නාමල් කුමාර සිරිසේන හමුවීමට වලි කන්නේ හොර සහතික චෝදනාවෙන් ගැලවීමට නොව රාජ්‍ය විරෝධී කුමන්ත්‍රණ චෝදනාවෙන් බේරීම සඳහා ය.
හමුදාව, පොලීසිය සහ මිලිටරි පොලීසිය ලැජ්ජා විය යුතුය
නාමල් කුමාර යනු බත් පතේ පහරන්නෙකු බව යලි යලින් පසක් කළ අයෙකි. නාමල් කුමාර දැන් කියන්නේ මරා-සිරා ජුන්ටාව හා සම්බන්ධ හඬ පටයන්ද තමා සතු බවය. තමා අත් අඩංගුවට පත් වුවහොත් ඒවා මාධ්‍යයට නිකුත් කරන බවය. නාමල් කුමාර දිගාමඩුල්ලෙන් පාර්ලිමේන්තුවට ටිකට් එක ඉල්ලුවේද මෙම කථාව කියමිනි. නාමල් කුමාර ආරක්ෂා කරන්නේ ආරක්ෂක අමාත්‍යංශය සහ පොලීසිය බාරව සිටින එදා මෙදා තුර රටේ පහල වූ තිරිසන්ම පාලකයා වූ සිරිසේනය. පොලිසියේ ත්‍රස්ත විමර්ශනය‌ේ ප්රධානියා හිරේ දමා රටේ නීතියත් සමග සෙල්ලම් කරන එකම වරද කිහිපවරක් සිදු කළ නාමල් කුමාර වැනි පිළිල එළියේ සිටීම ගැන රටේ හමුදාව, පොලීසිය සහ මිලිටරි පොලීසිය ලැජ්ජා විය යුතුය. නාමල් කුමාර වහා අත් අඩංගුවට ගත යුතුය. නො එසේනම් එය තක්කඩින්ට ලයිසන් දීමක් වනු ඇත.
කීර්ති රත්නායක විසිනි
හිටපු හමුදා බුද්ධි අංශ නිලධාරී
Published on: Jan 7, 2019-2019 වසර දූෂණ වීරෝධී වසරක් බවට පත් කරන බවට ජනාධිපති මෛත්‍රීපාල සිරිසේන මහතා ප්‍රකාශ කර දින 06ක් ගතවන තැන ජනාධිපතිවරයා විසින් තම පුද්ගලික ලේකම්වරයා ලෙස, තමන්විසින්ම පත් කළ කොමිසම විසින් වරදකරුවෙකු ලෙස නම් කර සිටින රණවක ආරච්චිගේ දොන් ජනක මහතාව පත් කරගෙන තිබේ.
ඒ ජනාධිපතිවරයාගේ පුද්ගලික ලේකම්වරයා ලෙස කටයුතු කළ එරික් වීරවර්ධන මහතා ඉල්ලා අස්වීමෙන් ඇතිවූ පුරප්පාඩුව සඳහාය.
සීමාසහිත රක්නා ආරක්ෂක ලංකා සමාගම සහ ඇවන්ට්ගාඩ් සමාගම අතර සිදුව ඇති නීතිවි රෝධී ගණුදෙනුවලට අදාලව බරපතල වංචා, දූෂණ, රාජ්‍ය සම්පත්, වරප්‍රසාද සහ අධිකාරිය අනිසි ලෙස භාවිතා කිරීම සමබන්ධයෙන් විමර්ශනය කිරීමේ ජනාධිපති කොමිෂන් සභාව විසින් සිදු කළ විමර්ශනයේදී 13 දෙනෙකු චූදිතයන් කරමින් නිකුත් කර ඇති වාර්තාවේ 07ව චූදිතයා ලෙස නම් කර ඇති ජනක රනවක මහතාය.
ජනක රනවක යනු මහින්ද රාජපක්ෂ පාලන සමයේ කෝට්ටේ මහනගර සභාවේ නගරාධිපතිවරා ලෙස කටයුතු කළ තැනැත්තා වන අතර ඔහු ඇතුළු 13දෙනාට එරෙහිව අපරාධ නඩු පැවරි යුතු බවද බරපතල වංචා, දූෂණ, රාජ්‍ය සම්පත්, වරප්‍රසාද සහ අධිකාරිය අනිසි ලෙස භාවිතා කිරීම සමබන්ධයෙන් විමර්ශනය කිරීමේ ජනාධිපති කොමිෂන් සභාව නිර්දේශ කර ඇත.
රක්නා ලංකා සේවකයන් පැවති ජනාධිපතිවරණයේ ප්‍රචාරක කටයුතු සඳහා යොදා ගැනීම, රක්නා ලංකා ගිනිඅවි නීති විරෝධී ලෙස ඇවන්ට්ගාඩ් සමාගම වෙත පැවරීම සහ රක්නා ලංකා ආයතනයටත් නාවික හමුදාවටත් ලැබිය යුතු මුදල් නොගෙවීම, මුහුදු ආරක්ෂක සේවාවන් සැපයීමට අදාළ ව්‍යාපාර කටයුතු සිදුකිරීමේදී ඇවන්ට්ගාඩ් මැරිටයිම් සර්විසස් පුද්ගලික සමාගමට අනිසි වාසියක් සිදුවන ආකාරයට කටයුතු කිරීම, ඇවන්ට්ගාඩ් ආයතනය කටුකුරුන්ද විශේෂ කාර්ය බලකා කඳවුර තුළ අවි පුහුණු කටයුතු සම්බන්ධ ව්‍යාපාර කටයුත්ත සිදුකිරීට සඳහා තුවක්කු 17ක්, නිසි ආකාරයට බදු ගෙවීමකින් සහ නිසි බලපත්‍ර ලබා ගැනීමකින් තොරව එකී පුහුණු කටයුතු සඳහා භාවිතා කිරීම සහ එසේ සිදුකිරීමට සහාය දීම යන ප්‍රධාන සිද්ධීන් හතරක් සම්බන්ධයෙන් වන චෝදනා, ජනාධිපති කොමිසම විසින් තහවුරු කර තිබේ.
මෙම වැරදි සම්බන්ධයෙන් හිටපු ආරක්ෂක ලේකම් ගෝඨාභය රාජපක්ෂ, දෙහිවල ගල්කිස්ස හිටපු නගරාධිපති ධනසිරි අමරතුංග, ආරක්ෂක අමාත්‍යාංශයේ හිටපු අතිරේක ලේකම් සුජාතා දමයන්ති ජයරත්න, බස්නාහිර පළාත් සභාවේ හිටපු ඇමති උපාලි කොඩිකාර, රක්නා ආරක්ෂක ලංකා සමාගමේ හිටපු සභාපති, මේජර් ජනරාල් පාලිත ප්‍රනාන්දු සහ ඇවන්ට්ගාඩ් අධිපති නිශ්ශංක සේනාධිපති යන අය අපරාධමය වරදවල් සිදු කර ඇති බැවින් ඔවුන්ට එරෙහිව අපරාධ නඩු පැවරි යුතු බවද එම කොමිසම නිර්දේශ කර ඇත.
තමන් වංචාවට, දූෂණයට විරුද්ධ බවත් 2019 වසර දූෂණ විරෝධී වසරක් බවට පත් කරන බවටත් පුරසාරම් දෙඩූ ජනාධිපතිවරයා මෙලෙස තමු පුද්ගලික ලේකම් ලෙස මෙරට සිදුවූ විශාලතම වංචාව වන බැඳුම්කර වංචාව හා සමාන වංචාවක් වන ඇවන් ගාඩ් වංචාවේ චූදිතයෙකු පත් කර ගැනීම තමන් මෙම වසර ආරම්භයේදී සිදු කළ ප්‍රර්තනයට සපුරා පිටුපෑමකි.
එමෙන්ම ජනාධිපතිවරයා සභාපතිත්වය දරන ශ්‍රී ලංකා නිදහස් පක්ෂයේ ලේකම් වරයා ලෙස පසුගියදා පත් කර ගත් දයාසිරි ජයසේකර මහතා, බැඳුමකර වංචාවට සම්බන්ධ අර්ජුන් ඇලෝසියස්ගෙන් රුපියල් ලක්ෂ ගණනින් මුදල් ලබා ගත්බවට අධිකරණයේදී හෙළිවූ අතර පසුව දයාසිරි ජයසේකර මහතා පාර්ලිමේන්තුවේදී ප්‍රකාශයක් කරමින් තමන් එලෙස මුදලක් ලබාගත් බවද පිළිගත්තේය.
ජනාධිපතිවරයා තම මුවින් ප්‍රකාශ කරන කාරණාවට පටහැනිව හාත්පස වෙනත් දෙයක් සිදුකිරීම හේතුවෙන් මේ වනවිට ඔහු රට ඉදිරියේ විහිළුකාරයෙකුගේ තත්වයට ඇද වැටී තිබේ.
Published on: Jan 3, 2019- පොහොට්ටු පක්ෂයේ අවශ්‍යතාවක් ඉටු කරන්නට ගිය සුළු හා මධ්‍යම පරිමාණ ව්‍යාපාරිකයන්ගේ සංවිධානයේ සභාපති ඇතුළු පිරිසක් මාධ්‍යෙව්දින්ගෙ බැන තර්ජනය කොට මාධ්‍ය හමුව අතරමග නවතා පිටත්ව ගොස් තිබේ.
පිළිකා ඖෂධ ජාවාරමක් පවතින බවට හෙළි කරන්නට පැමිණි මේ පිරිස අවසානයේ මාධ්‍යෙව්දින්ගේ ප්රශ්න හමුවේ නිරුත්තර වීම නිසා ඔවුන් මෙලස මාධ්‍යෙව්දින්ට බැන තර්ජනය කර ඇත.
බස්නාහිර පළාත් සෞන්ධර්ය නිකේතනයේ පැවැති මෙම මාධ්‍ය හමුව අද පෙරවරුවේ පැවැති අතර ඊට සුළු හා මධ්‍යම පරිමාණ ව්‍යාපාරිකයන්ගේ සංවිධානයේ සභාපති සංජය පෙරේරා ඇතුළු පිරිසක් සහභාගී වි සිටියහ.
ඔවුන් මීට පෙර මාධ්‍ය හමුවක් කැදවා කළ කරුණු කීවා මිස වෙනත් කාරණා හෙළිදරව් නොකිරිම හේතුවෙන් මාධ්‍යෙව්දින් ප්රශ්න කරන්නට වූවේ මෙය සෞඛ්‍ය ඇමතිවරයා සමග පවතින පෞද්ගලික කොන්තරයක් මත කරනා මාධ්‍ය හමුවක්ද යන්නය.
එය එසේ නොවන බව ප්‍රකාශ කිරිමෙන් පසු මාධ්‍යෙව්දින් නැවත ප්රශ්න කරන්නට වූවේ මෙය පිළිකා රෝගින්ගේ දුක පලිහක් කර ගනිමින් පොදු ජන පක්ෂයේ දේශපාලන අරමුණු ඉටු කිරිමට ගන්නා උත්සාහයක් නොවේදැයි ප්රශ්න කළ මාධ්‍යෙව්දින් ඔවුන් මිට පෙර පොදු ජන පක්ෂය සමග ගණුදෙනු කළ ආකාරය ගැනද ප්‍රකාශ කිරිම හේතුවෙන් ඔවුන් මාධ්‍යෙව්දින්ගේ අනන්‍යතාවය විමසමින් මාධයවේදින්ට බැන තර්ජනය කරන්නට වූහ.
ඒත් සමග ඇතිවූ නොසන්සුන්තාවය මත පිරිස එම ස්ථානයෙන් පිටව ගියේ මාධ්‍යෙව්දින්ට බැන තර්ජනය කරමිනි. පොහොට්ටුවේ උවමනාවට හා ජනාධිපති සිරිසේනගේ උවමනාවට මෙය කරන බවට කළ ප්රශ්න කිරිම්වලට පිළිකා ජාවාරම හෙළි කිරිමට පැමිණි පිරිසට උත්තර නොමැතිවිම නිසා ඔවුන් මෙලෙස බැන තර්ජනය කරන්නට වූහ.
පසුව මාධ්‍යෙව්දින් ප්‍රකාශ කළේ සත්‍ය තොරතුරු හෙළි කරනවා විනා පෞද්ගලිකව මිනිසුන්ට මඩ ගැසිමට පවත්වන මෙවැනි ප්‍රවෘත්ති සාකච්ඡා වර්ජනය කළ යුතු බවයි.
Published on: Jan 2, 2019- ජනපති ඝාතන කුමන්ත්‍රණයක් ගැන අපරාධ පරීක්ෂණ දෙපාර්තමේන්තුවට පැමිණිල්ලක් කළ නාමල් කුමාර නම් පුද්ගලයා යුද හමුදාවට සහ නාවික හමුදාවට බැඳී ඉන් පළා කියන පුද්ගලයකු බව අපරාධ පරීක්ෂණ දෙපාර්තමේන්තුව අද කොළඹ කොටුව මහේස්ත්‍රාත් අධිකරණයට දැනුම් දුන්නේය.
අපරාධ පරීක්ෂණ දෙපාර්තමේන්තුව අධිකරණය හමුවේ පෙන්වා දුන්නේ දුෂණ විරෝධී බලකායේ මෙහෙයුම් අධ්‍යක්ෂ නාමල් කුමාර නමැත්තා 2009 වසරේදී නාවික හමුදාවට බැඳී පුහුණුව ලැබූ අයෙකු බවත් එලෙස පුහුණුව ලබමින් සිටියදී මාස තුනකට පමණ පසුව සේවය අතහැර පලාගොස් ඇති ඔහු 2011 වසරේදී ශ්‍රී ලංකා යුද හමුදාවට බැඳී පුහුණුව ලබා සේවයෙන් පලාගොස් ඇති බවයි.
ඔහු නාවික සහ යුද හමුදා සේවයට එක් වීමේදී 2001 වසරේදී අධිසම්මාන දෙකක් හා සම්මාන තුනක් සහිතව සාමාන්‍ය පෙළ විභාගයෙන් විෂයන් 10 සමත් වූ බවට අධ්‍යාපන සහතික ඉදිරිපත් කර ඇති බව එහිදී පෙන්වා දුන් අපරාධ පරීක්ෂණ දෙපාර්තමේන්තුව ඔහු සමත් වී ඇත්තේ සාමාන්‍ය පෙළ විභාගයෙන් විෂයන් තුනක් පමණක් බව පසුව සිදුකළ පරීක්ෂණවලදී අනාවරණය වූ බව පෙන්වා දුන්නේ ය.
ව්‍යජ ලේඛන ඉදිරිපත් කර සේවයට බැඳීම සහ හමුදා සේවයෙන් පලායාම සම්බන්ධයෙන් ඔහුට එරෙහිව විමර්ශන සිදුකරන බව ද අපරාධ පරීක්ෂණ දෙපාර්තමේන්තුව අධිකරණයේදී කියා සිටියේ ය.
නාමල් කුමාරගේ අතේ පැලවු බොරු ගැන අනාවරණය පහතින් කියවන්න …..
http://198.211.112.164/archives/19576
http://198.211.112.164/archives/19983
http://198.211.112.164/archives/19902
Published on: Dec 20, 2018- තමන්ට ෆොන්සේකාගේ නම ඇහෙන විටත් තමන් භීතීයට පත්වන බවත් ඒ හේතුවෙන් ෆොන්සේකාට කිසිඳු අමාත්‍යංශයක් ලබා නොදිමට හැකියාවක් තිබේ නම් එය අතිශය අවශ්‍යතාවක් බව ජනාධිපති මෛත්‍රීපාල සිරිසේන පවසා තිබේ.
එක්සත් ජාතික පෙරමුණු රජයේ කැබිනට් අමාත්‍යවරුන් 28 දෙනකු හෙට උදේ 8.30 ජනාධිපති මෛත්‍රීපාල සිරිසේන ඉදිරියේ දිවුරුම් දීමට නියමිත අතර ඇමැතිවරුන් ලෙස පත් කළ යුතු මන්ත්‍රීවරුන් 36කගේ ලැයිස්තුවක් එක්සත් ජාතික පක්ෂය විසින් ජනාධිපතිවරයා වෙත යවනු ලැබ තිබුණු අතර ඉන් නම් කිහිපයක් ජනාධිපතිවරයා කපා දමා තිබේ.
ඒ අනුව ශ්‍රීලනිපයෙන් ආණ්ඩුවට එක්වූ ලක්ෂ්මන් සෙනවිරත්න, විජිත් විජිතමුණි ද සොයිසා, පියසේන ගමගේ සහ එච් එම් ෆවුසි යන නම් ද, සරත් ෆොන්සේකා සහ පාලිත රංගේ බණ්ඩාර යන මන්ත්‍රීවරුන්ගේ නම් ද ඇමැති ලැයිස්තුවෙන් ඉවත් කර තිබේ.
පසුව ඒ සම්බන්ධයෙන් ජනාධිපති නිල නිවසේ ඊයේ(19) හදිසී හමුවක් ජනාධිපති සහ අගමැති අතර සිදුවු අතර සරත් ෆොන්සේකා, පාලිත රංගේ බණ්ඩාර යන මන්ත්‍රීවරුන්ට සහ ශ්‍රීලනිපයේ සිට ආණ්ඩුවට ගිය මන්ත්‍රීවරුන් හතර දෙනකුට අමාත්‍ය ධුර ලබා නොදීමට විවිධ හේතු දක්වා තිබුනද එවා කිසිවක් කිසිදු තර්කයක් නොමැති පුස්-සුරි වර්ගයේ හේතු බවයි එම සාකච්ඡාවට එක්වු මන්ත්‍රීවරයෙකු සදහන් කළේ.
කෙසේවෙතත් ඊයේ (18) පැවති ශ්‍රීලනිප මධ්‍යම කාරක සභා හමුවෙන් පසුව මන්ත්‍රීවරුන් කිහිප දෙනෙකු සමග මෛත්‍රී ෆොන්සේකා සම්බන්ධයෙන් අදහස් පලකර තිබේන අතර මෛත්‍රී එහිදි සදහන් කර ඇත්තේ ෆොන්සේකාගේ සම්බන්ධයෙන් තමන්ට දැඩි බයක් ඇති බවත් ෆොන්සේකාට බලය ලැබිම යනු තමන්ගේ ජිවිතය අනතුරට පත්වන බවයි.
Published on: Dec 15, 2018 – ජනාධිපති මෛත්‍රිපාල සිරිසේන සහ ආරක්ෂක අමාත්‍යංශයේ හිටපු ලේකම් ගෝඨාභය රාජපක්ෂ ඝාතන කුමන්ත්‍රණයක් සම්බන්ධයෙන් නාමල් කුමාර නම් පුද්ගලයා ප්‍රකාශ කළ කරුණු සම්බන්ධයෙන් මෙතෙක් කිසිදු පිළිගත හැකි සාක්ෂියක් ලැබී නොමැති බව පොලිස් මාධ්‍ය ප්‍රකාශක රුවන් ගුණසේකර රොයිටර් පුවත් සේවයට පවසා තිබේ.
මාස තුනකට වැඩි කාලයක් අපරාධ පරීක්ෂණ දෙපාර්තමේන්තුව මගින් මේ පිළිබදව පරීක්ෂණ පැවැත්වූ බවද ඔහු එම පුවත් සේවයට වැඩිදුරටත් සදහන් කර ඇත.
මේ සම්බන්ධයෙන් පොලිස්පති පූජිත් ජයසුන්දර මහතා ඇතුළු පොලිසියේ ඉහළ නිලධාරීන් රැසකගෙන් ප්‍රකාශ සටහන් කර ගැනීමට අපරාධ පරීක්ෂණ දෙපාර්තමේන්තුව කටයුතු කරන ලදි. එම දෙපාර්තමේන්තු ආරංචි මාර්ග උපුටා දක්වමින් මීට පෙර මාධ්‍ය වාර්තා සදහන් කළේ සහකාර පොලිස් අධිකාරිවරයකු හැර වෙනත් කිසිදු පුද්ගලයකු ඝාතනය කිරීමේ කුමන්ත්‍රණයක් ක්‍රියාත්මක වී නැති බවයි.
එසේම ජනාධිපතිවරයාගේ අවශ්‍යතාව මත මේ සිද්ධියට අදාළව සාක්ෂි මැවීමේ උත්සාහයක් ක්‍රියාත්මක බවත්, ඒ සදහා ජනාධිපතිවරයාගේ පාර්ශ්වයෙන් අපරාධ පරීක්ෂණ දෙපාර්තමේන්තුවට දැඩි බලපෑමක් එල්ල වෙමින් පවතින බවත් පසුගිය දිනවල විශේෂයෙන් “ලංකා” පුවත්පත් අනාවරණය කර තිබිණි. මේ පුවත සම්බන්ධයෙන් නීතිමය පියවර ගන්නා බවද ජනාධිපතිවරයාගේ පාර්ශ්වයෙන් නොනිල ලෙස එම පුවත්පතට දැනුම් දී තිබූ බවද වාර්තා විය.
මේ අතර ජනාධිපතිවරයා ඔක්තෝබර් 26දා සිදු කරන ලද ව්‍යවස්ථා විරෝධී ක්‍රියාව සම්බන්ධයෙන් හේතු දක්වමින් අවස්ථා ගණනාවකදී පවසා තිබුණේ තමන්ව ඝාතනය කිරීමට උත්සාහ දැරීම මේ තීරණය ගැනීමට ප්‍රධාන හේතුවක් බවයි. ඒ සියල්ල අසත්‍ය බවත්, ජනාධිපතිවරයා විසින් මේ කරුණු සියල්ල ගොතා ඇති බවත් රොයිටර් පුවත් සේවයට නිල වශයෙන් පොලිස් මාධ්‍ය ප්‍රකාශකවරයා ලබා දුන් ප්‍රකාශයෙන් තහවුරු වේ.
COLOMBO (Reuters) – A plot to kill the president, links to foreign intelligence, a rogue police officer and a missing sniper: the snippets of news emerging from Sri Lanka in recent weeks seem plucked from the pages of paperback fiction
Published on: Dec 11, 2018- මෛත්‍රීපාල ශ්‍රී ලංකා නිදහස් පක්ෂයේ හිටපු ලේකම්වරයා ය. මහින්ද ජනාධිපති කාලෙ ඔහු ඒ ආණ්ඩුවේ සෞඛ්‍ය ඇමතිවරයා ය. මහින්දත් එක්ක එකට ආණ්ඩු කරන කොට යටින් දිගට ම ගේම් අදිමින් සිටියේ ය. ඒ ගේම් කොච්චර ද කියනවා නම්, එකට ආප්ප කාලා එළියට බැහැලා, මහින්දට විරුද්ධව ඡන්දෙට ආවේ ය. කාපු ආප්පවලටවත් කෙළෙහිගුණයක් නැතැයි යන්න පටබැඳුණේ ඒ අනුව ය. එදා මහින්ද රාජපක්ෂට තිබුණු විරෝධය මෛත්‍රීපාලට පිනා චාන්ස් එකක් වූයේ ය. එකට ආප්ප කාපු එකා මෙච්චර ද්‍රෝහිකමක් කරලා රටේ ජනාධිපති වේවි කියලා මහින්ද හීනෙන්වත් නොසිතුවේ ය. ඒත්, එය කෙසේ හෝ සිදු විණි.
එතැන් සිට දිගට ම සිරිසේන දීග කෑවේ රනිල් වික්රමසිංහ සමඟ ය. රනිල් මහා විශාල කැප කිරීමක් කළ බව පුන පුනා කිව්වේ ය. පහුගිය අවුරුදු තුනහමාරෙ ම රනිල් එක්ක එකතු වෙලා මහින්දව පතුරු ගැහැව්වේ ය. මහින්දගේ ගෝලයන්වත් පතුරු ගැහැව්වේ ය. රනිල් එක්ක එකට නැවත ආප්ප කකා හිටපු සිරිසේන හිටපු ගමන් වෙනස් වූයේ ය. වෙනස් වෙලා ආපහු මහින්ද එක්ක හොඳට ම යාළු වුණේ ය. ඒ යාළුකම කොච්චර ද කියනවා නම්, මහින්දව අගමැති පුටුවේ ම වාඩි කළේ ය. මුළු රට ම වික්‍ෂිප්ත විය. කිසි ගාණක් නැතිව මෛත්‍රී එදා ම ගැසට් නිවේදන තුනක් නිකුත් කළේ ය. එකක් රනිල්ව ඉවත් කරන එක ය. අනෙක මහින්දව පත් කරන එක ය. ඊ ළඟ එක වුණේ එදින ම රාත්‍රී සිට පාර්ලිමේන්තුව වසා දමන ගැසට් එක ය. මේ ගැසට් තුනෙන් දෙකක් නීති විරෝධී ය. අනෙක ප‍්‍රජාතන්ත‍්‍ර විරෝධී ය. දින කීපයකට පසුව නව ඇමතිවරුන් පත් කරන ගැසට් එක ද ගැහුවේ ය. ඒකත් ව්‍යවස්ථා විරෝධී බැවින්, නීති විරෝධී ය. අන්තිමට බැරි ම වෙලා බිත්තියට හේත්තු වුණාට පස්සේ පාර්ලිමේන්තුව විසුරුවා හැරීමේ ගැසට් එක ද ගැසුවේ ය. එයද මුළුමනින් ම නීති විරෝධී එකකි. මෙහෙ ම බැලුවා ම මහින්ද අගමැති කරන්න ගිහිල්ලා, මෛත්‍රීපාල නීති විරෝධී ගැසට් හතරක් සහ ප‍්‍රජාතන්ත‍්‍ර විරෝධී ගැසට් එකක් නිකුත් කරමින්, දැනටමත් බරපතළ වරදකට චෝදනා ලැබ ඇති චූදිතයෙක් ය.
ඇත්තට ම මහින්ද මේ ගේමට එකඟ වුණේ තමන් ඇතුළු කණ්ඩායමේ නඩුවලින් බේරෙන්නට ය. ඒකට එකඟ වූයේ මෛත්‍රී දීපු ලණුව කාපු නිසා ය. මෛත්‍රීපාල කැට තියා කිව්වේ, බහුතරය තමන්ට ඉන්නා බවක් ය. ඒ ලණුව කාපු මහින්ද පළමු වතාවේ දී ම හොඳට ම සවුත්තු වූයේ ය. තමන්ගෙ ම කට්ටිය ප්රශ්න අහන්න පටන් ගත්තේ ය. “ඇයි සර් මෙහෙ ම දෙයක් කර ගත්තේ” යැයි හැමෝ ම අහන්න පටන් ගත්හ. හොර රහසේ ගහපු ගේමක් නිසා ඒක පැහැදිලි කර ගන්න මහින්දට කොහෙත් ම හැකියාවක් වුණේ නැත. ඒ නිසා සිද්ධ වුණේ මෛත්‍රීපාල එක්ක මලපැනීම ය. සරම උස්සලා, පොළොවේ අඩි හප්පලා “කෝ තියෙනවයි කියපු එකසිය දහතුන” යැයි මෛත්‍රීපාලගෙන් ප්රශ්න කළේ ය. මෛත්‍රීට උත්තර නැති වෙච්ච අසරණයෙක් වුණු නිසා දහඅතේ කල්පනා කළේ ය. බැරි ම තැන ‘යන යකා කොරහත් බිඳගෙන යනවා’ කියලා පාර්ලිමේන්තුව විසුරුවා හැරියේ ය.
එතැන් සිට මහින්දගේ කුජීත වීම තව තවත් වැඩි විය. ශ්‍රේෂ්ඨාධිකරණයෙන් විසුරුවා හැරීම වාරණයට ලක් කළේ ය. පාර්ලිමේන්තුවේ විශ්වාස භංග දෙකකින් ම මහින්ද පරාජයට පත් වුණේ ය. අගමැති ලෙස වියදම් කරන්න තිබූ මුදල් මුළුමනින් ම කප්පාදු වුණේ ය. අන්තිමට අභියාචනාධිකරණ තීන්දුවෙන් අගමැති ධුරය හා ඇමති ධුර සියල්ල වාරණයට ලක් වුණේ ය. කොටින් ම ගත්තොත්, මේ ටික කාලය තුළ මහින්ද මහා ලොක්කෙක් වාගේ අගමැති වුණේ ය. හෙලිකොප්ටරයෙන් උඩින් ගමන් ඇරැඹුවේ ය. හිටපු ගමන් ඩෝං ගාලා ආපහු නිකම් ම නිකම් මන්ත්‍රී වුණේ ය. ඉංග්‍රීසියෙන් ගත්තොත්, පී.එම්. එම්.පී. වුණේ ය. අද වෙන කොට හතර වටෙන් මහින්ද කරගත්ත ගොන්කමක් කියා ඇහෙන්න පටන්ගෙන ඇත්තේ ය.
මේ සියල්ල අතරේ මෛත්‍රීපාල තමන්ට එරෙහිව ඇති චෝදනාවලින් ගැලවෙන්නට පාරක් සොයමින් සිටින්නේ ය. එහි පළමුවැන්න විශ්වාස භංග යෝජනාව පළමුවැනි කොටස ඉවත් කර ගැනීමේ උත්සාහයයි. යූ.එන්.පී.යත් එක්ක එකඟතාවයකට ආවේ ඒකට ය. අන්තිමට අලුත් ම අලුත් විශ්වාස භංග යෝජනාවක් දයාසිරි ජයසේකර මැදිහත් වී සකස් කළේ ය. මෛත්‍රීගේ උපදෙස් මත හදපු ඒ යෝජනාව යූ.එන්.පී.ය ලව්වා නැවත ඉදිරිපත් කර ගන්න උත්සාහ කළේ ය. ඒත්, ජ.වි.පෙ. විරෝධය නිසා ඒක පස්සට ගන්න සිද්ධ වුණේ ය. මේ අතරවාරයේ කරකියා ගන්න දෙයක් නැති හින්දා ශ්‍රී.ල.නි.ප.යේ මන්ත්‍රීවරුන් කණ්ඩායමක් ලවා මහින්දට ඉල්ලා අස් වෙන්න යැයි කියෙව්වේ ය. හතර වටෙන් කුජීත වෙලා ඉන්න මහින්දට මලපැන්නේ ඒකට ය. “මම අයින් වෙන්නෙ නැහැ. පුළුවන් නම්, එයාට කියනවා මාව අයින් කරන්න” යැයි කිව්වේ ආපු කේන්තියට ය.
කොහො ම වුණත්, මෛත්‍රී ආපහු හිර වුණේ ය. දැන් මහින්ද අයින් වෙන්නෙ නැත් නම්, මෛත්‍රීට සිද්ධ වෙන්නේ අයින් කරන්න තවත් ගැසට් එකක් ගසන්නට ය. ඒක කරපු ගමන් මෛත්‍රීපාල තවත් වතාවක් ව්‍යවස්ථාව කඩපු චෝදනාවට ලක් වන්නේ ය. ඒ කියන්නේ, මෛත්‍රීපාල දැන් හදන්නේ මහින්දව බිල්ලට දීලා තමන් ගොඩ යන්නට ය. විශ්වාස භංගයේ පළමු කොටස ඉවත් කරලා, දෙවැනි කෑල්ල ආයේ ගෙනැල්ලා සම්මත වීමෙන් වෙන්නෙත් මහින්දව බිල්ලට දීම ය.
පහුගිය කාලේ රනිල්ට එරෙහි විශ්වාස භංග ගෙනාවේ ඇත්තට ම මෛතී‍්‍රපාල ය. අද මහින්දට එරෙහිව විශ්වාස භංගය ගේන්නෙත් මෛතී‍්‍රපාල ම ය. දෙන්නාව ම පත් කරන්නෙත් මෛතී‍්‍ර ම ය. දෙන්නාව ම අයින් කරන්න හදන්නේත් මෛතී‍්‍රපාල ම ය. මේක මහ අරුමපුදුම යටිකූට්ටු වැඩක් ය. මෛතී‍්‍රපාලගේ පැත්තෙන් ගත්තොත්, දැනටමත් අන්ත කුජීත වෙලා අවසන් ය. යූ.එන්.පී.කාරයන්ගේ පරම හතුරා දැන් මෛතී‍්‍රපාල ය. පක්‍ෂයට ද්‍රෝහි වෙලා පක්ෂය පාවලා දීලා කරපු වැඩෙන් ශී‍්‍ර ලංකාකාරයන්ට මෛතී‍්‍රපාලව එපා වෙලා ගොඩක් කල් ය. දැන් මේ දවස්වල කරපු දේවල්වලින් මෛතී‍්‍රපාලව රටේ කිසි ම කෙනෙක් තඹ දොයිතුවකට ගණන් ගන්නේ නැත. ගණන් ගන්නේ නැතිව විතරක් නොවෙයි, හැමෝට ම ඇත්තේ මඩු වලිගයෙන් ම තළන්න හිතෙන තරමේ කේන්තියක් ය. ඒ නිසා මෛතී‍්‍රපාලගේ කුජීත වීම ගැන නම් කතා කරලා වැඩක් නැත. ප්රශ්නය ඇත්තේ, මේ වැඩෙන් මහින්දත් කුජීත වීම ය.
පහුගිය කාලය තුළ රනිල් – මෛත්‍රී ආණ්ඩුවේ වැඩ නිසා මහින්ද බේරිලා හිටියේ ය. රනිල් මහින්දත් එක්ක දාපු ඩීල් නිසා බේරිලාත් හිටියේ ය. යහපාලන ආණ්ඩුවේ ගොන් වැඩ නිසා මහින්ද යාන්තම් ගොඩ ගිහින් තිබුණේ ය. එහෙ ම හිටිය මහින්ද මේ වැඩෙන් නැත්තට ම නැති වුණේ ය. ජනතාව ඉස්සරහ අගමැතිකම් ගන්න ගිහින් අන්තිමට ම පීචං වුණේ ය. බහුතරයක් පෙන්නා ගන්න බැරිව අන්තිම සවුත්තු වී ඇත්තේ ය. ඒ මඳිවාට උසාවිවලින් දුන් තීන්දුවලින් තවත් සවුත්තු වුණේ ය. තමන්ගේ කණ්ඩායම ඇතුළෙන් ම “අයියෝ මොකක් ද මේ කර ගත්තේ ?” කියන ප‍්‍රශ්නයට ලක් වී ඇත්තේ ය. කුමාර වෙල්ගම ඔළුව අත ගගා දිගට ම ටොකු ඇනගෙන ඇනගෙන යන්නේ ය. මහා ලොකු චණ්ඩියෙක් වගේ පෙන්නාගෙන හිටිය මහින්ද අගමැතිකමට පෙරේතකමේ අන්තිම හෑල්ලුවට පත් වුණේ ය. මේ වන තෙක් ජාත්‍යන්තරයේ කිසිදු රටක් මහින්දව පිළිගත්තේ ද නැත.
ඒ විතරක් නොව මේ මාස එකහමාරට රටේ වෙච්ච දේවල් ද මහින්දට කටඋත්තර නැති දේවල් ය. බන්දුල ගුණවර්ධන සිංගප්පූරු ගිවිසුම එහෙ ම ආවාට ගියාට අහෝසි කරන්න බැහැ කිව්වේ ය. රුපියල බාල්දු වෙන එක මට අතින් අල්ලලා නවත්තන්න බැහැ යැයි ද කිව්වේ ය. ටී.එන්.ඒ. එකේ ඉන්නේ කොටි කිය කියා ඉඳලා අන්තිමට ටී.එන්.ඒ. එකේ ම මන්ත්‍රී කෙනෙකුට ඇමතිකමක් දුන්නේ ය. ඒ මඩකලපුවේ වියාලේන්ද්‍රන් මන්ත්‍රීවරයා ටය. එදා සිවාජිලිංගම් එක්ක මුලතිව් මහ විරු සමරුවට ගිය එක ම ටී.එන්.ඒ. මත්‍රීවරයා ය. එහි දී හමුදා සොල්දාදුවන් උතුරේ කුණු කාණු අතුගාන්න දාන්න ඕනෑ යැයි කීවේ මොහු ය. ඒ විතරක් නොවෙයි, මහ විරු සැමරුම් ගණනාවක් පසුගිය නොවැම්බර් 26 වැනිදා උතුරේ පැවැත්විණි. ඒ සියල්ල සිදු වුණේ, මහින්ද ව්‍යාජ ලෙස අගමැතිව ඉන්න කාලයේ දී ය. වාසුදේව නානායක්කාර අත්අඩංගුවේ ඉන්න එල්.ටී.ටී.ඊ. සැකකරුවන්ව වර්ගීකරණය කරලා කට්ටියක් නිදහස් කරනවා, තව කට්ටියක් පුනරුත්ථාපනය කරනවා යැයි කිව්වේ ය. එදා මහ ලොකුවට එල්.ටී.ටී.ඊ. සැකකරුවන් නිදහස් කරන එක වැරැදියි කියලා කියපු කට්ටිය මාසයක් යන්න කලින් කියපු දේවල් ය. ඩග්ලස් දේවානන්ද සියලු ම එල්.ටී.ටී.ඊ. හිටපු සාමාජිකයන්ට මුදල් දෙනවා යැයි ද කිව්වේ ය. මහින්දට මේ කිසිවකට උත්තරයක් නැත. රණවිරුවෝ දඩයම් කරනවා යැයි කෑ ගහපු කට්ටිය ආපු ගමන් ම ත්‍රිවිධ හමුදාවේ ම ප්රධානියා වුණු රවීන්ද්‍ර විජේගුණරත්නව හිරගෙට යැව්වේ ය. මඩකලපුවේ පොලිස් නිලධාරීන් දෙන්නෙකුට වෙඩි තියලා මරලා දාපු සිද්ධියක් වුණේ ය. ගුවන් හමුදා කඳවුරට මීටර් දෙසීයක් දුරින් ඒ වාගේ ම පොලිසිය ආසන්නයේ මේ වෙඩි තැබීම සිදු වුණේ ය. මේ ටික කාලෙට හාමුදුරුවරුන්ට කඳුළු ගෑස් ප‍්‍රහාර එල්ල වුණේ ය. විශ්වවිද්‍යාල ශිෂ්‍යයන්ට. රැකියා විරහිත උපාධිධාරීන්ට පන්න පන්නා කඳුළු ගෑස්, බැටන් පොලු ප‍්‍රහාර දියත් කළේ ය. ඒ ඔක්කො ම සිද්ධ වුණේ මහින්ද අගමැති ලෙස වැඩ කරන්නට පටන් ගත්තාට පසුව ය. මේ ඔක්කො ම සිද්ධිවලින් වරක් නොව සියක් වාරයක් මහින්දව හෙළිදරවු වුණේ ය; පීචං වුණේ ය; අන්තිමට කුජීත වුණේ ය.
ඒ විතරක් නොව මහින්ද පාර්ලිමේන්තුව විසුරුවා හැරපු ගමන් පොහොට්ටුවේ සාමාජිකත්වය ගැනීමට ඇතුළේ ලොකු අවුලක් හැදුවේ ය. මෛත්‍රීපාලට ද මලපැන්නේ ඒකට ය. ශ්‍රී ලංකා නිදහස් පක්‍ෂයට ආදරය කරන බොහෝ අය හිතුවේ, මහින්දයි, මෛත්‍රීයි එකතු වුණාට පස්සේ පක්ෂය ශක්තිමත් වේවි යැයි කියා ය. ඒත් සිද්ධ වුණේ ඊට හාත්පසින් ම විරුද්ධ දෙයකි. ඒ නිසා ශ්‍රී ලංකා නිදහස් පාක්‍ෂිකයෝ බහුතරයක් දෙනා මහින්දගේ මේ හැසිරීම අනුමත කරන්නේ නැත. සාමාන්‍ය නීතිය අනුව පක්‍ෂයෙන් ඉවත් වුණා ම මාසයක කාලයක් මන්ත්‍රී ධුරයේ සිටිය හැකි ය. ඉන් එහාට මන්ත්‍රී ධුරයේ තව දුරටත් සිටීම ද ප්රශ්නයක් වනු ඇත. මෛත්‍රීපාලට ඕනෑ නම්, මහින්ද ඇතුළු පොහොට්ටුවට ගිය කණ්ඩායම ම මන්ත්‍රී ධුරවලින් ඉවත් කිරීම ද කළ හැක්කේ ය. එහෙ ම වුණොත්, මහින්දට අගමැතිකමත් නැති වෙලා මන්ත්‍රීකමත් නැති වන්නේ ය. මෛත්‍රීපාල කරපු දේවල් දිහා බැලුවා ම එහෙ ම දෙයක් නොකරාවි යැයි හිතන්නට ද අමාරු ය. කුජීත වෙලා කුජීත වෙලා හොඳට ම කුජීත වෙන්නේ මෛත්‍රී මහින්දගේ මන්ත්‍රීකමත් නැති කරපු දාට ය.
රටක් ගිනි තියපු මෛත්‍රීපාල සිරිසේන අන්තිමට මහින්දවත් නැත්තට ම නැති කර දැම්මේ ය. ඉස්සරහට මොනවායින් මොනවා කරයි ද හිතා ගන්නටවත් බැරි ය. කොහොමටත් මේ කරපු වැඩෙන් රටත් විනාශ වුණේ ය. මෛත්‍රීත් විනාශ වුණේ ය. මහින්දත් විනාශ වුණේ ය. එහෙ ම බැලුවා ම කවුරු මොන වුවමනාවට මෙය කළා ද යන්නත් ප‍්‍රශ්නසහගත ය. මේ සියල්ල අනෙක් පැත්තට හැරුණත්, මේ ජාතියේ ජනාධිපති කෙනෙක් එක්ක ආණ්ඩු කරන්න බැරි බව නම්, මහින්දට තේරුම් යන්නට ඇතැයි සිතිය හැකි ය. ඒ කියන්නේ, ආණ්ඩුවක් හදා ගත්තත්, මෛත්‍රීපාලත් එක්ක මහින්ද ආණ්ඩු කරන්න ගියොත්, ඔය ඉතුරු වෙලා තියෙන ටිකත් නැති වෙලා යන එක නම්, සිකුරු ය.
එදා මහින්ද ඡන්දේ ඉල්ලන වෙලාවේ එකසිය දහතුන තිබුණත්, මම මහින්දට අගමැතිකම දෙන්නේ නැහැ කියලා කිව්වේ, ඔය මෛත්‍රීපාල ම ය. අන්තිමට ඒ මහින්දට ම අගමැතිකම දුන්නේ ය. අද දෙසියවිසිපහක් ම තිබුණත් රනිල්ට දෙන්නේ නැහැ කියන්නේ ඒ මෛත්‍රීපාල ම ය. ඒත්, ඒ ගැන කිසිදු විශ්වාසයක් නැත්තේ ය. අන්තිමට ම රනිල්ට දෙන්නත් පුළුවන් ය. මෛත්‍රීපාලගේ හැටි එහෙ ම ය. ඒ ඔක්කො ම වැඩවලින් මහින්දව නැතිභංග වන්නේ ය. මෛත්‍රීපාල කියන විදියට රනිල් රට විනාශ කළේ ය. ආණ්ඩුව විනාශ කළේ ය. පක්ෂය විනාශ කළේ ය. මෛත්‍රීපාලවත් විනාශ කළේ ය. ඒ වාගේ ම මෛත්‍රීපාලත් රට විනාශ කළේ ය. ආණ්ඩුව විනාශ කළේ ය. තමන්ගේ පක්‍ෂයත් විනාශ කළේ ය. ඒ ඔක්කො ම කරලා අන්තිමට මහින්දවත් විනාශ කළේ ය. එහෙ ම බැලුවා ම මේ තුන්දෙනා එකතු වෙලා ඔවුනොවුන් විනාශ කර ගත්තෝ ය. රටත්, ජනතාවත් විනාශ කර ඇත්තේ ය. එසේ නම්, තව දුරටත් මොවුන් ගැන විශ්වාසයක් තියා ගැනීමෙන් කිසිදු පලප‍්‍රයෝජනයක් නොවන්නේ ය. දැන්වත් ඒ බව තේරුම්ගත යුත්තේ ය.
ලංකා ඉරිදා සංග්‍රහය
Published on: Dec 7, 2018- ශ්‍රී ලංකා නිදහස් පක්ෂ ව්‍යවස්ථාවට සංශෝධන ඉදිරිපත් කර පක්ෂයේ නායකත්ව වෙනසක් සිදු කිරීමේ සැලසුමක් ඇති බවට අනාවරණය විමෙන් මෛත්‍රී ජනාධිපතිවරයා තවත් අර්බුදයකට මුහුණ දි සිටින බව වාර්තා වේ.
ශ්‍රී ලංකා නිදහස් පක්ෂයේ මධ්‍යම කාරක සභාව අද රැස්වීමට නියමිත අතර එහිදි අදාළ කුමන්ත්‍රණය සම්බන්ධයෙන් කරුණු යොයා බලන බවයි ජනපති සදහන් කර ඇත්තේ.
ශ්‍රීලනිප මධ්‍යම කාරක සභාව හරහා අදාළ යෝජනාව ඉදිරිපත් කිරීමට පෙර පක්ෂ නායකයින්ගේ යෝජනාවක් ලෙස ඉදිරිපත් කිරීමේ සැලසුමක් ක්‍රියාත්මකවන බවට දැනට තොරතුරු වාර්තා වි ඇති බවත් පවතින දේශපාලන අර්බුදය විසඳීම සඳහා කෙටි කාලයක් සඳහා එක්සත් ජාතික පක්ෂය සමග සම්බන්ධතා පැවැත්වීමට අවස්ථාව ලබාදෙන ලෙස ශ්‍රී ලංකා නිදහස් පක්ෂයේ මන්ත්‍රීවරුන් 14 දෙනකු කර තිබේන ඉල්ලිමක්ද කර තිබු නමුත් ජනපති සිරිසේන ඒ සම්බන්ධයෙන්ද හොද ප්‍රතිචාරයක් නොදැක්විම මෙම කුමන්ත්‍රණයට ආසන්නම හෙතුව වි ඇති බවද දැන ගන්නට තිබේ.
වාර්තා වන අන්දමට මේ සඳහා හිටපු ජනාධිපති චන්ද්‍රිකා බණ්ඩාරනායක කුමාරතුංග දැඩි මැදිහත් වීමක් මේ සදහා පවතින අතර ශ්‍රී ලංකා නිදහස් පක්ෂයේ මධ්‍යම කාරක සභාවේ සාමාජිකත්වයෙන් වැඩි පිරිසක් ඇයට හිතවත් අය බවද මෙ වනවිට තහවුරු වි තිබේ.
Published on: Dec 5, 2018- පසුගිය 26 වැනිදා, තමන්ට් එජාපයේ 20ක් ඇතුලුව අති බහුතරයක් ඇති බව පවසමින් හිටපු ජනාධිපති මහින්ද රාජපක්ෂ ව්‍යවස්ථා විරෝධී ආකාරයට අගමැතිලෙස පත්කර මේ වනවිට මහින්දට යන එන මං නැතිකර දැමු මෛත්‍රීපාල සිරිසේන ජනාධිපතිවරය එම ගේම් සියල්ලම දැනුවත්ව ගැසූ එවා බව මේ වනවිට අනාවරණය වෙමින් තිබේන බව අප දේශපාලන වාර්තාකරු සදහන් කළේ.
ඒ අනුව මේ වනවිට සියලු අර්බුද පෙන්වමින් හදිසි ජනාධිපතිවරණයක් කැඳවීම කෙරෙහි ජනාධිපති මෛත්‍රීපාල සිරිසේනගේ අවධානය යොමුවි ඇති අතර ඒ අනුව තමන්ට් නොලැබි ගිය ජනපති අපේක්ෂකත්වය පහසුවෙන්ම ලබා ගැනිමටත්,ශ්‍රී ලංකා නිදහස් පක්ෂයේ සහ මහින්දගේ නායකත්වයෙන් යුත් පොහොට්ටුවේ ඡන්ද සියල්ලම ලබා ගනිමින් පහසුවෙන්ම මැතිවරණ ජයගත හැකි බව මෛත්‍රී මේ වනවිට විස්වාසය කරමින් සිටි.
මහින්ද රාජපක්ෂ ප්‍රධන කණඩායමට පාර්ලිමේන්තුවේ බහුතරය නොමැතිවීම සහ එක්සත් ජාතික පෙරමුණට බහුතරය තිබුණත් එම පෙරමුණේ නායක රනිල් වික්‍රමසිංහට කිසිසේත් අගමැති ධූරය යළි ලබා නොදෙන බවට ජනාධිපති මෛත්‍රීපාල සිරිසේන සිටින දැඩි ස්ථාවරය අනුව එකම විකල්පය වන්නේ ජනාධිපතිවරණය කැඳවීම බව මේ වනවිට ජනපති ශ්‍රිලනිප ජ්‍යෙෂ්ඨයන්ට පෙන්වා දෙමින් සිටි.
ජනාධිපති මෛත්‍රීපාල සිරිසේන වෙත ජනාධිපති අපේක්ෂකකම ලබාදීමට මහින්ද රාජපක්ෂ ප්‍රධාන ශ්‍රී ලංකා පොදු ජන පෙරමුණ මේ වන විටත් එකඟතාවය පළ කර ඇති බව මෛත්‍රීපාල සිරිසේන සිය ශ්‍රිලනීප ජ්‍යෙෂ්ඨයන්ට පවසා ඇති අතර ශ්‍රී ලංකා නිදහස් පක්ෂය ප්‍රධාන එක්සත් ජනතා නිදහස් සන්ධානය සහ ශ්‍රී ලංකා පොදු ජන පෙරමුණ ඇතුළු පුළුල් සන්ධානයකින් එම ජනාධිපතිවරණයට ඉදිරිපත් විමටද මේ වනවිට මෙහෙයුම් දියත් කර තිබේන බව වාර්තා වේ.
Published on: Dec 3, 2018- මෛත්‍රීපාල සිරිසේන වැනි දුර්වලයෙකුගේ ලණු ගිල්ල මහින්ද රාජපක්ෂ ඉතිහාසයෙ දරුණුම පරාජයට අද හිමිකම් කිවා.ඒ අනුව ව්‍යවස්ථා විරෝධීව ජනපති පත්කල අග්‍රාමාත්‍ය මහින්ද රාජපක්ෂට සහ වත්මන් අමාත්‍ය මණ්ඩලයට එම ධූර දැරීමට නීත්‍යනුකූල හිමිකමක් නොමැති බවට අභියාචනාධිකරණය විසින් අතුරු නියෝගයක් නිකුත් කර සිටියා.
ඊට අමතරව අග්‍රාමාත්‍ය මහින්ද රාජපක්ෂ ට සහ වත්මන් අමාත්‍ය මණ්ඩලයට ලබන 12 වැනිදා අභියාචනාධිකරණය හමුවේ පෙනී සිටින්නැයි ද අභියාචනාධිකරණය අද (03) නොතීසි නිකුත් කල බවයි කොළඹ අප විශේෂ වාර්තාකරු සදහන් කළේ.
අග්‍රාමාත්‍ය මහින්ද රාජපක්ෂට සහ වත්මන් අමාත්‍ය මණ්ඩලයට එම ධූර දැරීමට නීත්‍යනුකූල හිමිකමක් නොමැති බවට නියෝග කරන රිට් ආඥාවක් නිකුත් කරන්නැයි ඉල්ලා පාර්ලිමේන්තු මන්ත්‍රීවරුන් 122 දෙනෙකු ගොනු කළ රිට් පෙත්සම අසා නිමවන තුරු මෙම අතුරු නියෝගය බල පැවැත්වේන් අතර පෙත්සම අභියාචනාධිකරණ විනිසුරු ප්‍රිතිපද්මන් සූරසේන සහ අර්ජුන ඔබේසේකර යන විනිසුරු මඩුල්ල විසින් මෙම තීන්දුව පුකාශයට පත් කෙරිණි.
එක්සත් ජාතික පක්ෂ නායක රනිල් වික්රමසිංහ ප්‍රමුඛ පාර්ලිමේන්තු මන්ත්‍රීවරුන් 122 දෙනෙකු විසින් අදාළ පෙත්සම ගොනු කර ඇති අතර මහින්ද රාජපක්ෂට අග්‍රාමාත්‍ය ධුරය දැරිමට සහ වත්මන් අමාත්‍ය මණ්ඩලට අමාත්‍ය ධුර දැරිමේ නිත්‍යානුකූල හිමිකමක් නොමැති බැවින් ඔවුන්ගේ පත්විම් බල රහිත කරන ලෙස අදාල පෙත්සම මගින් ඉල්ලා තිබේ.
Published on: Dec 3, 2018- තමන්ට 2020 ජනාධිපතිවරණ අපේක්ෂකත්වය ලබාදෙන ඕනෑම පාර්ශවයකට අග්‍රාමාත්‍යධූරය ලබාදීමට සූදානම් බව සිරිසේන ජනාධිපති පවසා ඇතැයි වාර්තා වෙයි.
මේ බව වාර්තා වන්නේ පසුගියදා කුමන්ත්‍රණ ආණ්ඩුවට සහය දක්වා පිල් මාරු කර මේ වන විට ස්වාධීනව ඉන්නා පාර්ලිමේන්තු මන්ත්‍රී විජේදාස රාජපක්ෂ විසින් එක්සත් ජාතික පෙරමුණේ ප්‍රබල මන්ත්‍රීවරයෙකුට සිදුකර ඇති දැනුම්දීම අනුවය.
එහිදී විජේදාස මන්ත්‍රීවරයා සඳහන්කර ඇත්තේ ජනාධිපතිවරයාට විශ්වසනීය සහතිකයක් ලබාදීමට හැකියාවක් ඇත්නම් ප්රශ්නය අවසන් කිරීමට ඔහු සූදානම් බවය.
එහිදී එක්සත් ජාතික පෙරමුණ මන්ත්‍රීවරයා විමසා ඇත්තේ රනිල් වික්රමසිංහ නායකතුමාට වුවත් අග්‍රාමාත්‍ය ධුරය ලබාදීමට ජනාධිපති සූදානම්ද කියාය. ඊට ප්‍රතිචාර දක්වමින් විජේදාස රාජපක්ෂ මන්ත්‍රීවරයා පවසා ඇත්තේ රනිල් නොව ඕනෑම අයෙකුට අග්‍රාමාත්‍යධුරය ලබාදීමට සූදානමක් ඇති බවත් 2020 ජනාධිපති අපේක්ෂකත්වය ලැබෙනවා නම් රනිල් මහතාට අපේක්ෂකත්වය ලබාදීමේ කිසිම ප්රශ්නයක් නොමැති බවය.
ඊට හේතුව ලෙස විජේදාස මන්ත්‍රීවරයා පෙන්වාදී ඇත්තේ රනිල් වික්රමසිංහ මහතාට අග්‍රාමාත්‍ය ධුරය ලබාදීමට පක්ෂව මේ වන විටත් මන්ත්‍රීවරුන් ලිඛිත අත්සන් සහිතව ලිපියක් ලබාදී තිබීමත් අඛණ්ඩව පාර්ලිමේන්තු බහුතරය මහින්ද රාජපක්ෂට නොමැති බව ඔප්පුවී තිබීමත්ය.
ඒ අනුව තමන්ට පාර්ලිමේන්තුවේ 113 ක බහුතරයක් නොව ඊටත් වඩා ඇති බව පවසමින් දේශපාලන කුමන්ත්‍රණයක් දියත්කල සිරිසේන ජනාධිපති දියත් කළ දේශපාලන කුමන්ත්‍රණයේ සැබෑ හේතුව පැහැදිළිය.
Published on: Dec 2, 2018 – පොලිස් භටයන් දෙදෙනකු මඩකලපුවේ දී වෙඩිතබා ඝාතනය කිරීම ගැන ජනාධිපතිවරයාගේ නායකත්වයෙන් යුත් ශ්‍රී ලංකා නිදහස් පක්ෂයේ ජ්‍යෙෂ්ඨ නායකයකු වන විනායගමුර්ති මුරලිදරන් හෙවත් කරුණා සම්බන්ධයෙන් සැක පල වී ඇත.ඝාතන සම්බන්ධයෙන් දෙමළ ජාතික සන්ධානය (TNA) කරුණා පිළිබඳව බරපතල සැක මතු කර ඇති අතර
TNA මන්ත්‍රී එම් ඒ සුමන්දිරන් පාර්ලිමේන්තුවේ දී කියා සිටියේ මහින්ද රාජපක්ෂ ප්‍රමුඛ එක්සත් ජනතා නිදහස් සන්ධානයට රාජ්‍ය බලය පැවරීමට ජනාධිපතිවරයා විසින් පියවර ගැනීමෙන් අනතුරුව විනයාගමුර්ති මුරලිදරන් හෙවත් කරුණා නිහඬව සිට නැවත ක්‍රියාකාරී වී සිටින බවයි.
“ඔක්තෝබර් 26 දා සිදුවීම් වලින් පසු කරුණා අම්මාන් එලියට ඇවිත් කතා කරන්න පටන්ගන්න තියෙනවා. අපිට තියෙන තොරතුරු අනුව ඔක්තෝබර් 26 දා සිට නැවත පණ ගසා ආ අය ගැන බරපතල සැකයක් මතු වෙනවා.”
මඩකලපුව නගරයේ සිට කිලෝමීටර් හයක් පමණ දුරින් පිහිටි වව්නතිව් සහ වලයිරවු යා කරන පාලම අසල පිහිටි පොලිස් මුරපොලක සේවයේ නිරතව සිටියදී වෙඩි තබා මරා දමා තිබු කල්මුණේ වාසී ගනේෂ් දිනේෂ් සහ ගාල්ලේ උඩුගම නිරෝෂන් දෙදෙනාගේ සිරුරු සිකුරාදා උදෑසන හමුවී තිබුනි.
භටයන් දෙදෙනාගේ ගිනිඅවිද පැහැරගෙන ගොස් ඇතැයි වව්නතිව් පොලිසිය ප්‍රාදේශීය මාධ්‍යවේදීන්ට පවසා තිබේ.
පොලිස් භටයන් දෙදෙනාගේ ඝාතනය සම්බන්ධයෙන් විභාග කිරීම සඳහා පොලිස්පති වරයාගේ නායකත්වයෙන් යුත් විශේෂ පරීක්ෂක කණ්ඩායමක් වව්නතීවූ වෙත මේ වන විට ලඟා වී සිටී.
