Aug 29, 2019 – විසිවෙනි ආණ්ඩුක්‍රම ව්‍යවස්ථා සංශෝධනය සිදු කොට විධායක ජනාධිපති ක්‍රමය අහෝසි කිරීම සඳහා වන සාකච්ඡාවකට ජනාධිපති මෛත්‍රිපාල සිරිසේන මහතාගේ ආරාධනයෙන් අග්‍රාමාත්‍ය රනිල් වික්‍රමසිංහ මහතා සහභාගි වූ බව එක්සත් ජාතික පක්ෂයේ උපනායක අමාත්‍ය රවි කරුණායක මහතා පවසා සිටියා.
ඒ අනුව විධායක ජනාධිපති ක්‍රමය අහෝසි කර ගැනීමට සහය ලබා ගැනීමට අගමැතිවරයා ජනාධිපතිවරයා හමු වූ බවට වන වාර්තා සත්‍ය වුවද එම හමුවීම සිදු වූයේ හුදෙක්ම ජනාධිපතිවරයාගේ ඉල්ලීම මත බවයි කරුණානායක අමාත්‍යවරයා පවසා සිටියේ.
ජනාධිපති මෛත්‍රිපාල සිරිසේන මහතා විසින් තමන්ට කළ ආරාධනාවක් අනුව තමන් අගමැතිවරයා සමඟ ජනාධිපති කාර්යාලයේදි ජනාධිපතිවරයා හා අදාළ සාකච්ඡාවට එක් වූ බව අමාත්‍යවරයා සඳහන් කළා.
විසිවන ආණ්ඩුක්‍රම ව්‍යවස්ථාව සංශෝධනය කොට විධායක ජනාධිපතිධූරය අහෝසි කිරීමට තමන්ට සහය වන ලෙස එහිදි ජනාධිපති සිරිසේන විසින් අගමැති වික්‍රමසිංහයන්ගෙන් ඉල්ලා සිටි බවත් අමාත්‍ය රවි කරුණානායක සඳහන් කළා.
මේ වන විට එක්සත් ජාතික පක්ෂය ද ශ්‍රි ලංකා නිදහස් පක්ෂයට ජනාධිපතිවරණ ඡන්ද සටනට අවතීර්ණව සිටින බවත් විධායක ජනාධිපතික්‍රමය අහෝසි කිරීමට නම් අනිවාර්යයෙන්ම විපක්ෂ නායක මහින්ද රාජපක්ෂ මහතාගේ අනුමැතිය අවශ්‍ය බව ජනාධිපතිවරයාට පිළිතුරු ලබා දෙමින් අගමැතිවරයා විසින් පැවසු බවද අමාත්‍ය කරුණානායක අනාවරණය කර සිටියා.
ඊට අමතරව පාර්ලිමේන්තුව නියෝජනය කරන අනෙකුත් පක්ෂ වල නායකයන්ගේ සහය ද ඒ සඳහා අවශ්‍ය බවත් අගමැතිවරයා විසින් මෙහිදි පෙන්වා දීතිබෙනවා .
විධායක ජනාධිපති ධූරය අහෝසි කිරීම සඳහා අවශ්‍ය නම් පක්ෂ නායකයන්ගේ හමුවක් කැඳවීමටද තමන් සූදානම් බව ජනාධිපතිවරයා මෙහිදි පවසා තිබෙනවා .
