Published on: Feb 22, 2018 – හිටපු ජනාධිපතිවරයෙකු වන ඩී.බි. විජේතුංග මහතාට මෙන් පරණ පිණක් ඵල දුන්නා හා සමානව අග්‍රාමාත්‍ය තනතුරට පිවිසි රනිල් වික්‍රමසිංහ මහතාගේ ජන්ම කේන්ද්‍රයට අනුව රාජ්‍යකාරක රවි ග්‍රහයා මාර්තු 15 දක්වා ගමන් කරනුයේ කුම්භ රාශියේ හෙවත් 12 වැන්නේය. මෙය යහපත් ස්ථානයක ගෝචරවීමක් නම් නොවේ. අවාසිදායක තත්ත්වයක් ගෙනදේ. පසුගියදා පැවැත්වු පළාත් පාලන මැතිවරණයට ද මෙය යම්තාක් දුරට බලපෑ වා විය හැකිය.
එසේම, ලග්නස්ථානයේ බුධ නීචව සහ සිකුරු උච්චව ගමන් කිරීම එකකට එකක් පරස්පර ගති ලක්ෂණ ඉස්මතු වේ. බුද්ධිමය සිතුවිලි යට කර ගෙන අලංකාර විච්චූර්ණ, හරසුන් සිතුවිලි මතුවේ. බුද්ධියට වඩා ශෝභනත්වයට මුල්තැන දේ. Wi-Fi කලාප සංකල්පය පුන පුනා ඉදිරිපත් කරනුයේ මේ නිසාය. මේ වන විට ශ්‍රී ලංකාවේ බහුතරයක් ජනතාව ආර්ථික වශයෙන් පිඩාවට ලක්ව ඇති බව කවුරුත් දන්නා කරුණකි. දරුවන් උදේට කුස ගින්නේ පාසල්වලට යන ආකාරය උදේ රැස්වීමක් වේලාවට සියැසින් දැකගත හැකිය. මා මේ පවසන්නේ නගරයේ පාසල් ගැන නොව ඈත ගම් දනව්වල දුප්පත් පාසල්වල ළමයින් ගැනය.
නගරයේ දරුවන්ට ටැබ් බෙදා දෙද්දි ගමේ දරුවෝ ගස් යට ඉගෙනීම කරති. ශාලා පහසුකම් නොමැත. තිබෙන ඒවායේත් වහලවල් දිරා ගොස්ය. මේස පුටු නැත. ළමයින්ට අගහිඟකම් අපමණය. මේ තරම් රටේ විසඳිය යුතු ප්‍රශ්න තිබියදි අගමැතිතුමා Wi-Fi කලාප ගැන කතා කිරීම කෙතරම් හාස්‍යජනකද ? මේ කතා කරනුයේ බුධගේ නීචත්වය සහ සිකුරු උච්චත්වය නිසාය.
මෙවැනි හරසුන් බොළඳ ක්‍රියා කලාපයන් නිසා ජනතාවගේ අප්‍රසාදය නිසැකයෙන්ම එතුමාට හිමිවීම කිසිසේත් වැළැක්විය නොහැකිය. එසේම, අහඹු ලෙස ලැබුණු තනතුර රැක ගැනීමට එතුමා නොගන්නා උත්සහායක් නැත. මාර්තු 15 දා රවි ලග්නයට පිවිසීමත් සමඟම අගමැති තනතුරේ වෙනසක් නොවන අතර, ජන කළකිරීම එලෙසම පවතී.
හැම මැති ඇමැත්තෙක්ම තීරණ තීන්දු ගනුයේ කොළඹ අවට සිරි නරඹා පමණක් නිසා රජය පිළිබඳ ජනතාව තුළ කිසිදු ප්‍රසාදයක් ඉදිරි කාලවලදී ද දක්නට නොලැබෙනු ඇත. අප කන හැටි ලිපා දැන ගත්තට ඡන්ද දාසලාගේ කර පිටින් යන මැති ඇමතිවරු නොදකිති. මේ තත්ත්වය මේ රජයට පමණක් නොව පසුගිය රජයට ද අදාළය.
බුධ නීචව ගමන් කරන මේ කාලයේ දරුවන් ගැන වඩාත් සැලකිලිමත් විය යුතුය. ඔවුන්ගේ අඩුපාඩු ගම් දනව් සිසාරා සොයා බැලිය යුතුය. පන්ති කාමර ඩිජිටල් තාක්ෂණීයකරණය කිරීමට යන උත්සහාය වරදක් නොවුණත් ශ්‍රී ලංකාවේ දක්ෂ දරුවන් සිටින බොහෝ පාසල්වල අඩුපාඩු එමට ඇති බව කිව යුතුමය.
එසේම, බුධ සිකුරු යෝගය විශේෂයෙන්ම ගැහැණු දරුවන්ට භයානකය. ළමා දූෂණ, අපයෝජන ඇති විය හැකිය. තම ගැහැණු දරුවන් පිළිබඳ වැඩි අවධානයක් යොමු කළ යුතු කාලයකි.
රජය තුළ පවතින විවිධ කඹ ඇදිලි, අවුල් වියවුල්, රණ්ඩු සරුවල් මැද ජනාධිපති මෛත්‍රි සිරිසේන මහතාගේ ඔළුවද අවුල් වනු ඇත. ඔළුව ගිනිගත්තෙකුසේ ක්‍රියා කරයි. විටෙක ඔළුව නැත්තෙකු සේ ද හැසිරෙයි. ගුරු ග්‍රහයා සතුරුව ලග්නස්ථානයේ ගමන් කිරීම මීට හේතුවයි. මේ නිසා ඉදිරි කාලයේ ද ගන්නා තීරණ, තීන්දු, ප්‍රකාශ ජාත්‍යන්තරයේ අප්‍රසාදයට පවා ලක්වීමට ඉඩ ඇති බැවින්, ඉතාම කල්පනාකාරීව කටයුතු කළ යුතුය. නොමැති නම් මේ කළු පැල්ලම් ඉතිහාසයට එක්වෙමින් කළු පැල්ලම් ගොඩ වැඩිවීමට පුළුවන.
මේ අතර කෙටි කාලයකින් සංවිධානය වු “ පොහොට්ටුව‘‘ පවතින රජයේ දුර්වලතා මතින් ජනතාව වෙත වඩාත් සමීප වු ආකාරයක් පසුගිය මැතිවරණයෙන් පවා දක්නට ලැබුණි. එදා රට ගැන සිතු ජනතාව අද බඩ ගැන පමණක් සිතන බව දැන් පාලකයෝ නොදනිති. එදා පාලකයෝ ජනතාවගේ බඩ ගැන ද සිතු බව ජනතාවට දැන් තේරුම් යයි. එසේ වීමට හේතුව මේ කාලයේ ජනතා නියෝජිත ග්‍රහයා හෙවත් සෙනසුරු ගමන් කරනුයේ හිටපු ජනාධිපති මහින්ද රාජපක්ෂ මහතාගේ සිව්වැන්නේ වීමයි.
ගෑස් මිළ තවත් 300/- ක් වැඩි කිරීමට යන බව දැන ගන්නට ලැබුණි. අත්‍යාවශ්‍ය බඩු මිල දිනෙන් දින ඉහළ යන විට ජනතාව ද පොහොට්ටුව වෙත තව තවත් සමීප වීම අරුමයක් නොවේ. මේ නිසා පොහොට්ටුව දිනෙන් දින පිපෙන ලකුණු තත්කාලීන ග්‍රහචාරය අනුව දක්නට ලැබේ.
අගමැතිතුමාගේ දසවැන්නේ ගෝචර වන ශනි නිසාත්, කුජගේ සම්ප්‍රාප්තිය නිසාත් ජනතාව පමණක් නොව ආරක්ෂක අංශවල ඇතැම් උසස් නිළධාරින් සහ සෙසු නිළධාරින් පවා රජය ගැන කළකිරීමට පත්වනු ඇත.
පසුගිය දිනවල “ අතින් ගිලිහුන බුලත් කොළය” යළි අතට එනු ඇත. එසේ ආවත් පාලක පන්තියේ පවතින ව්‍යාකූලතාවන් නිසා පාලිත පන්තිය පීඩාවට පත් වන අතර, මාර්තු 7 වනදා සිදු වන කුජ මාරුව රජයට හිතකර නොවේ. කැළඹිලි සහිත කාලයක් උදාවිය හැකියි. ලේ වැගිරීම් ඇති වීමට පුළුවන.
කෙසේවෙතත්, පවතින අර්බුධකාරී තත්ත්වයන් හමුවේ ග්‍රහ චලනයක් ද හේතුකොට ගෙන ජනතාව දැවෙමින් සිටින කබලෙන් ලිප් ගලට වැටීම කිසිසේත් වැළැක්විය නොහැකිය.ලිප් ගලෙන් ලිපට වැටේවිද යන්න ඉදිරි කලාප වලින් බලමු.
ජ්‍යෙතිෂ විද්‍යාඥ
ආචාර්ය රෙක්ස් ගුණවර්ධන
072-4040500
011-4282555
