Published on: Aug 11, 2018- “මම ආනන්ද ජයසුන්දර සහ ඔහුගේ බිරිඳ වන චාන්දනී සමඟ කටයුතු කළේ ළඟ මිතුරන් ලෙස. අපේ හිතවත්කම ඉතාම ඉහළින් තිබුණා. ආනන්ද ජයසුන්දර අශෝක් අබේසිංහ මහත්තයගෙ සම්බන්ධීකරණ ලේකම්වරයා අපේ හිතවත්කම නිසා මම ලක්ෂ 20ක් දුන්නා. මගේ ගේ මාස දෙකකට එයාලට දුන්නා. දැන් මට සල්ලිත් නෑ. ගේත් නෑ. මට බරපතළ විදිහට පහර දීලා තුවාල කළා. මගේ සියලු දේ නැති කළා. බොහොම ළඟින් ඇසුරු කරපු මනුස්සයෙක් මෙහෙම අපරාධයක් කරයි කියලා මම විශ්වාස කළේ නෑ…”
මෙය චිත්‍රපටයක දෙබසක් නොවේ. ටෙලි නාට්‍යයක දෙබසක් ද නොවේ. මෙය දැඩි අසාධාරණයකට ලක් වූ කාන්තාවකගේ හැඟීම්බර කතාවක කොටසකි. ඇය කුරුණෑගල අලුත් මල්කඩුවාවේ පදිංචි ගම අධිකාරී මුදියන්සේලාගේ ජයවතී සෝමලතාය. ඇයගේ කතාව බරපතළ හෙළිදරවු කිරීමකි.
ඇයගේ නිවස සහ මුදලින් ලක්ෂ 20ක් මේ වන විට ආනන්ද ජයසුන්දර නම් තැනැත්තෙකු වංචා කොට ඇය මඟහරිමින් සිටින බව ඇය පවසන්නී ය.ප්‍රවාහන නියෝජ්‍ය අමාත්‍ය අශෝක් අබේසිංහ මහතාගේ සම්බන්ධීකරණ ලේකම්වරයෙකු වන ආනන්ද ජයසුන්දර නැමැත්තාට මේ බරපතළ මූල්‍ය හා දේපොළ වංචාව පිළිබඳ චෝදනා එල්ල වී තිබේ. සෝමලතා මහත්මියගේ කතාවේ සාරාංශය මෙයයි. සෝමලතා මහත්මිය සහ ආනන්ද ජයසුන්දර හා ඔහුගේ බිරිඳ ඉතාමත් ළඟ හිතවත්කමකින් යුක්තව සිට ඇත. සෝමලතා මහත්මිය වසර 23ක් කුවේට් දේශයේ රැකියාවක නිරත වී ඇත. ඒ කාලය තුළ ලංකාවට පැමිණි අවස්ථාවන් හි දී මේ පවුල සහ ඇය අතර ළෙන්ගතුකම් වර්ධනය වී ඇත. ළෙන්ගතුකම් කොතරම් ද යත්, ආනන්ද ජයසුන්දරට පළාත් පාලන මැතිවරණයට තරග කිරීම සඳහා මාස දෙකකට නැවතීමට ගෙයත්, රුපියල් ලක්ෂ 20කුත් ලබා දී ඇත. කෙසේ වෙතත්, මේ වන විට ආනන්ද ජයසුන්දර ඒ සියල්ල බලෙන් අත්පත් කරගෙන මඟහරිමින් ද සිටී. මේ කතාවේ සාරාංශයයි.
ආනන්ද ජයසුන්දර නියෝජ්‍ය අමාත්‍ය අශෝක් අබේසිංහ මහතාගේ සම්බන්ධීකරණ ලේකම්වරයා සේ ම පසුගිය පළාත් පාලන මැතිවරණයේ දී එක්සත් ජාතික පක්ෂයෙන් කුරුණෑගල ප්‍රාදේශීය සභාවට බමුණාවල කොට්ඨාසයෙන් තරග කොට පරාජයට පත් වූ අයෙකි. ඔහු කුරුණෑගල මීගමු පාරේ අලුත් මල්කඩුවාවේ පදිංචිව සිටී. මොහු පසුගිය පළාත් පාලන මැතිවරණයට තරග කරන බැවින්, ඔහුගේ ව්‍යාපාරික ස්ථානයේ පදිංචියට සහ මැතිවරණ කාර්යාලයක් පවත්වා ගැනීමට ඉඩකඩ මඳ බැවින්, අදාළ කාන්තාවගෙන් ඇයගේ නිවස මාස දෙකක පාවිච්චිය සඳහා ලබාගෙන ඇත. ඒ අතර ආනන්ද ජයසුන්දර නමැත්තා සෝමලතා මහත්මියගෙන් ලක්ෂ 20ක මුදලක් ලබාගෙන ඇත. මේ මුදල ලබා දී ඇත්තේ සෝමලතා මහත්මිය සතුව පැවැති ‘ඇලියන්’ වර්ගයේ මෝටර් රථය (භඋ ණූ – 0691) ෆිනෑන්ස් ආයතනයකට උකස් කිරීමෙනි. ඊට අදාළ ලියකියැවිලි සියල්ල ඇය සතුව පවතී. ආනන්ද ජයසුන්දර නමැත්තා මේ උකස් කිරීමට මඟ පෙන්වා ඇති අතර, ඊට තමාගේ හෝ තම පවුලේ අයෙකු සම්බන්ධ නොකිරීමට ද වගබලාගෙන ඇත්තේ යටි අරමුණක් සහිතව බව මේ වන විට පෙනී ගොස් තිබේ. රුපියල් ලක්ෂ 20 ලබා ගැනීමෙන් පසුව දින 15ක් 20ක් ඇතුළත ගෙවන බවට ද ඔහු පොරොන්දු වී ඇත. ඇය ලීසිං කර ලබාගෙන තිබූ මෝටර් රථය ගෙවා නිම කිරීමට මාස හයක් තිබිය දී මෙසේ නැවත උකස් කළ බව ඇය කියන්නී ය. ලබා ගත් රුපියල් ලක්ෂ 20 සඳහා ඇය මාසිකව රුපියල් 45,000.00ක පොලී ගෙවිය යුතුව ඇත. මේ වනවිට එය ගෙවීම පවා ඇයට ගැටලුවක් බවට පත්ව ඇති බව පවසන්නී ය.
ආනන්ද ජයසුන්දර නමැත්තාට අදාළ මුදල සහ ගෙය ලබා දීමෙන් පසුව නැවත කුවේට් දේශයේ රැකියාවට ගිය සෝමලතා මහත්මියට මාස තුනක් ගත වූ පසුව ද මුදල් හෝ නිවස ලබා දීමට ඔහු ක්‍රියා කර නොමැත. ඒ නිසාම නැවත සෝමලතා මහත්මියට මෙරටට පැමිණීමට සිදුව ඇත්තේ අදාළ ප්‍රශ්නය විසඳා ගැනීමටය. ලංකාවට පැමිණීමෙන් පසුව ආනන්ද නමැත්තාගෙන් අදාළ මුදල ඉල්ලා සිටිය ද, දිගින්දිගටම මඟහැරීමට ඔහු ක්‍රියා කර ඇත. නිවස ලබා දීමට ද ක්‍රියා කර නැත. අනතුරුව මොහුගේ සැබෑ මුහුණ එළියට එන්නේ සෝමලතා මහත්මිය දිගින්දිගටම ණය මුදල සහ නිවස ඉල්ලා සිටීමෙන් පසුව ය. අනතුරුව ආනන්ද නමැත්තා ඔහුගේ සහචරයන් ද සමඟින් අදාළ කාන්තාවට තර්ජනය කිරීම් පමණක් නොව ඇය පදිංචි නිවසට පැමිණ නිවසට පහර දීම් හා අලාභහානි සිදු කර ඇත. එක්තරා දිනක ඇය පදිංචි නිවසට පැමිණ තර්ජනය කිරීම්, පහර දීම් කරද්දි, 119 හදිසි පොලිස් ඇමතුම් අංශයට පැමිණිලි කළ ද, පොලිසියෙන් අදාළ පැමිණිල්ලට පැමිණ නැත.
ආනන්ද නමැත්තාගේ කරදර බාධා කිරීම්, ණය නොගෙවීම සහ නිවස ලබා නොදීම හේතුවෙන් නීතියේ පිළිසරණ පතා යන්නට ඇයට සිදු විය. ඇය පළමුවරට කුරුණෑගල පොලිසියේ පැමිණිල්ලක් කරන්නේ 2018 ජූලි 02 වෙනිදා ය. පැමිණිලි අංකය වන්නේ ඵධඔඊ 393 – 22 ය. දෙවන පැමිණිල්ල පැමිණිලි අංක ඵක්‍ඍ 2574 – 18 යටතේ 2018 ජූලි 18 වෙනිදා සිදු කර ඇත. තුන්වන පැමිණිල්ල ඵක්‍ඍ 2771 – 18 යටතේ සිදු කර ඇත්තේ 2018 අගෝස්තු 01 වැනිදාය.
මෙම අවනඩුව ගැන ප්‍රවාහන නියෝජ්‍ය අමාත්‍ය අශෝක් අබේසිංහට සහ ඔහුගේ බිරිඳට අදාළ කාන්තාව විසින් කරුණු සහිතව පෙන්වා දී ඇත. ඇමතිවරයා ප්‍රශ්නය විසඳා දෙන බව කීව ද, මේ දක්වා කිසිවක් සිදු වී නැත. එසේ ම ඇමතිවරයා ඇයට උපදෙස් දී ඇත්තේ, ගලේ බණ්ඩාර දේවාලයට ගොස් ආනන්ද නමැත්තාට විරුද්ධව පොල් ගසන ලෙසයි.
ඒ අතර පසුගිය දිනක මෙම කාන්තාව තමාගේ නිවසට ගොස් තිබුණේ තමන්ගේ බඩු රැගෙන ඒමටයි. එහි දී ආනන්ද නැමැත්තා සහ ඔහුගේ සහචරයන් එකතු වී අදාළ කාන්තාවට සහ ඇගේ සහෝදරියකට බරපතළ ලෙස පහර දී ඇත. පසුව රෝහල්ගත වුව ද, ආනන්ද සහ ඔහුගේ බිරිඳ ද රෝහල්ගත වී ඇත්තේ, පහර දුන් බව පවසමිනි. කෙසේ වෙතත්, අපේ රටේ නීතිය අනුව ආනන්ද නමැත්තා අත්අඩංගුවට ගත යුතු වුව ද, සිදු වී ඇත්තේ, ජිප් රථයේ දමාගෙන ගොස් සවස නැවත නිදහස් කිරීමයි.
මේ සිදුවීම රටේ සිදු වන සිදුවීම් අතුරින් එක් සිදුවීමක් පමණකි. දේශපාලන බලය අතට ගෙන ක්‍රියාත්මක වන පුද්ගලයෝ නීතිය තමන්ගේ යැයි සිතති. අපේ රටේ ඉහළ සිට පහළට දේශපාලනඥයන් තමන්ගේ ගැත්තන් ආරක්ෂා කරන්නේ ඉතාමත් පිළිකුල්සහගත ආකාරයෙනි. රනිල් වික්‍රමසිංහ අග්‍රාමාත්‍යවරයා බැඳුම්කර වංචාවට සෘජුව වගකිව යුතු අර්ජුන් මහේන්ද්‍රන් ආරක්ෂා කරයි. මහින්ද උදයංග වීරතුංග ආරක්ෂා කරයි. මෛත්‍රී තම දේශපාලන සගයන් ආරක්ෂා කරයි. තත්ත්වය එසේ වෙද්දී අශෝක් අබේසිංහ නියෝජ්‍ය අමාත්‍යවරයා තමන්ගේ සම්බන්ධීකරණ ලේකම්වරයා ආරක්ෂා කිරීම අරුමයක් නොවේ. අමාත්‍යවරයා ද සිහි තබා ගත යුතු යමක් ඇත. තමන් වෙනුවෙන් පෙනී සිටි තමන්ගේ දේශපාලන බලය වෙනුවෙන් කාලය, ශ්‍රමය, ධනය වැය කළ තමන්ගේ පාක්ෂිකයෙක්, විශේෂයෙන්ම අමාත්‍යවරයා වෙනුවෙන් ඡන්ද පෙට්ටි ප්‍රවාහනයට තමන්ගේම මෝටර් රථය නිර්ලෝභීව ලබා දුන් කාන්තාවක් තමන්ගේ සම්බන්ධීකරණ ලේකම්වරයා අතින් අසාධාරණයකට ලක් වෙද්දී, ඇය අතහැර තමාගේ එකා වෙනුවෙන් පෙනී සිටීම ඉතාමත් නිර්ලජ්ජිතය.
මේ ආණ්ඩුව බලයට පත්වෙද්දී නහුතයක් පොරොන්දු ජනතාවට ලබා දුන්නේ යහපාලනයක් ස්ථාපිත කරන බව ද කියමිනි. අශෝක් අබේසිංහ යනු එසේ කී ආණ්ඩුවේ නියෝජ්‍ය අමාත්‍යවරයෙකි. තමන්ගේම පාක්ෂිකාවකට මෙසේ වන්නේ නම්, අනෙක් පාක්ෂිකයන් සම්බන්ධයෙන් අනුගමනය කරනු ලබන පිළිවෙත සිතා ගත හැකි ය. මෙය කිසිසේත්ම යහපාලනය නොවේ. නීතිය ක්‍රියාත්මක වීමේ දී විවිධ කොමිෂන් සභා නිර්මාණය වී තිබුණ ද, මේ සිදුවීම් හරහා යළි යළිත් තහවුරු වන්නේ අදාළ කොමිෂන් නමට පමණක් පවතින ඒවා බව ය. කුරුණෑගල දී මේ අත්දකින දේ වෙනත් ප්‍රදේශයක දී වෙනස් ආකාරයකින් දැක ගත හැකිය. දේශපාලන බලය තමන්ගේ පටු වුවමනාවන් වෙනුවෙන් භාවිත කොට ජනතාව තළා පෙළා දමන්නේ නම්, එවන් පාලනයන්ට, එවන් පාලකයන්ට ජනතාව නිසි පිළිතුරක් ලබා දෙනු ඇත. සෝමලතා මහත්මිය මේ රටේ සාමාන්‍ය පුරවැසි පන්තියට අයත් කාන්තාවකි. අශෝක් අබේසිංහලාගේ දේශපාලන ගැත්තන්ට තව දුරටත් මෙවන් නිහීන, තුච්ඡ ක්‍රියාවන්හි නිරත වීමට ඉඩ දිය යුතු නැත. රටේ වගකිව යුත්තන් වහා මෙයට සාධාරණය ඉටු කළ යුතුය. ජනාධිපති සිරිසේන කාන්තාවන් ගැන කතා කරන්නේ මහ ඉහළිනි. මේ දිනවල රනිල් වික්‍රමසිංහ අගමැති ද කාන්තාවන් ගැන මහ ඉහළින් කතා කරයි. එය ජනතාව මුළා කිරීමට නොවේ නම්, වහාම මේ සිද්ධියේ දී මැදිහත් වී ඇයට සාධාරණය ඉටු කළ යුතුය. රනිල්ලා, මෛත්‍රීලා මේ දේශපාලන ගැත්තන්ට එරෙහිව ඔවුන්ගේ නීතිය ක්‍රියාත්මක කරනු ඇතැයි අපි විශ්වාස නොකරමු. එය එසේ වුව ද, මේ පිළිබඳව අපි දිගින්දිගටම රටටත්, ජනතාවටත් සත්‍යය හෙළිදරවු කරමු. මේ දේශපාලන ක්‍රමය තුළ ඇමති බලතල අතට ගත් දේශපාලන ගහලයන්ගෙන් තමන් සුරක්ෂිත නොමැති බව ජනතාවට නැවත වතාවක් සිතීමට බල කරන සිදුවීමක් ලෙස මෙය අර්ථකථනය කළ හැකිය. මේ පාදඩ දේශපාලන ක්‍රමය වෙනස් කිරීමකින් තොරව සෝමලතාලාට සාධාරණයක් ඉටු වේ යැයි අපි මොහොතකටවත් නොසිතමු.
(ආනන්ද ජයසුන්දර නම් අශෝක් අබේසිංහ නියෝජ්‍ය අමාත්‍යවරයාගේ සම්බන්ධීකරණ ලේකම්වරයාට අපි දුරකථනයෙන් කතා කොට අදාළ සිදුවීම සම්බන්ධයෙන් තොරතුරු විමසුවෙමු. ඔහු ප්‍රකාශ කලේ තමාට චොදනා කරන කාන්තාව පවසන්නේ සත්‍ය නොවන බවත් මෙම නිවස තමාගේ බවත්, එසේම ඇය තමාගෙන් මුදල් රු. ලක්ෂ 50ක් ගෙන නොදී සිටින බවත්ය. එහිදී අප ඔහුගෙන් විමසා සිටියේ අදාළ ඉඩමේ ඔප්පු අංකය ලබා දීමට හැකිද යන්නයි. එය ලබාදිය හැකි බව ඔහු ප්‍රකාශකල නමුත් පසුව තමාගේ නීතිඥයා තමන්ට කිසිවක් මාධ්‍යයට ලබා දීම නොකරන ලෙස දන්වා ඇති බව ප්‍රකාශ කලේය.)
එස්. කේ. ගමගේ (ඉරිදා ලංකා )
