Published on: Apr 9, 2020- කොරෝනා වසංගතය හමුවේ ජනතා සහන සැලසිම වෙනුවෙන් මහා බැංකුව නිකුත් කර තිබේන නිර්දේශ කිසිවක් බැංකු සහ මුල්‍ය ආයතන ක්‍රියාත්මක නොකරන බව අප දේශපාලන වාර්තාකරු සදහන් කළා.
සුළු,මධ්‍යම ඇතුලු ව්‍යාපාරික ප්‍රජාව වෙනුවෙන් බැංකු වෙත ලබාදිමට නිර්දේශ කර තිබේන සහන සහ ලිහිල් ක්‍රමවේදයන් ක්‍රියාත්මක කිරිම මේ අකාරයට බැංකු සහ මුල්‍ය ආයතන විසින් ප්‍රතිකේෂප කර ඇති අතර පවතින අර්බුදය ඉදිරියේදි බැංකු සහ මුල්‍ය ආයතන කඩා වැටිමේ අවදානමක ලක්ව ඇති බවත් එය ඉදිරියේදි තවත් බරපතළ විය හැකි බැවින් මහ බැංකුවේ නිර්දේශ ක්‍රියාත්මක කිරිමට නොහැකි බවයි. වසංගත තත්ත්වය හමුවේ මුදල් තැන්පත් කිරිම සම්පූර්ණයෙන්ම නතර වි ඇති අතර දෛනිකව ආපසු ගැනිම් පමණක් සිදුවන බැවින් බැංකු සතුව මුදල් සංචීත නොමැති විමද මෙම අර්බුදය උග්‍ර විමට හේතු වි තිබේ.
කොරෝනා ව්‍යසනය (COVID-19) මගින් බලපෑමට ලක් වූ ව්‍යාපාර හා පුද්ගලයන් සඳහා බැංකු සහන පහසු කිරීම උදෙසා ශ්‍රී ලංකා මහ බැංකුව සුවිශේෂී නියාමන ක්‍රියාමාර්ග රැසක් ක්‍රියාවට නංවා ඇති බවට මාර්තු 30 වැනිදා මුදල් අමාත්‍යංශය සහ මහ බැංකුව නිවේදනය නිකුත් කලද සහන බලාපොරොත්තුවෙන් අද බැංකු වෙත ගිය ව්‍යාපාරිකයන්ට බැංකු ප්‍රධානින්ගේන් ලැබුන එකම උත්තරය වුයේ “මහා බැංකුව කිව්වාට එවා කරන්න විදියක් නෑ… මහ බැංකුව කියනවා අපි කොහොමද කරන්නේ කියලා එයාල හිතන්නේ නෑ. මහා බැංකුව අපිට සල්ලි දෙනවා නම් අපි ලෑස්තියි එවා කරන්න …”
මේ අතර කිසිදු අදායමක් නොමැතිව යන එන මං නැති තත්වයට පත්ව ඇති ව්‍යාපාර, ස්වයං රැකියා කරන කණ්ඩායම් බැංකු හා මුල්‍ය ආයතන වලින් ගෙන ඇති ණය මුදල් සහ ලීසිං වාරික ගෙවීමට ද නොහැකි තත්වයකට පත්ව ඇති අතර රජය මේ සදහා ලබාදුන් බව කියන සහන සහිත චක‍්‍රලේඛ හතරක් මේ දක්වා නිකුත් වුවද ඒ සදහා අවශ්‍ය උපදෙස් අදාළ මුල්‍ය ආයතන වෙත ලැබි නෑ. රජය කියූ ණය වාරික සහනය ද තවමත් ලැබී නැති අතර සියලූ බැංකු තම ණය වාරික සුපුරුදු පරිදි තම ගිණුම් හිමියාගේ ගිණුම්වලින් අඩු කරගෙන තිබේ. ඒවා නැවත ගිණුමට දමන බව කීවද එයද සිදුව නෑ.
කොරෝනා ව්‍යසනය හෙවත් COVID–19 මගින් බලපෑමට ලක් වූ ව්‍යාපාර හා පුද්ගලයින් සඳහා සහන සැලසීම උදෙසා අවශ්‍ය නම්‍යශීලීත්වය බැංකු ක්ෂේත්‍රයට ලබාදීමේ අරමුණින් ශ්‍රී ලංකා මහ බැංකුවේ මුදල් මණ්ඩලය බලපත්‍රලාභී වාණිජ බැංකු සහ බලපත්‍රලාභී විශේෂිත බැංකු සදහා සුවිශේෂී නියාමන ක්‍රියාමාර්ග රැසක් හඳුන්වා දීමට තීරණය කර ඇති බවට නිකුත් කෙරුණු නිවේදනය.
ඒ අනුව, කොවිඩ්-19 මගින් බලපෑමට පත් ව්‍යාපාර හා පුද්ගලයන්හට සහන සැලසීම සඳහා බලපත්‍රලාභී බැංකු වෙත වැඩිදුරටත් ඉඩකඩ සපයා දීමේ අරමුණින් පහත සඳහන් සුවිශේෂ ක්‍රියාමාර්ග කඩිනමින් හඳුන්වා දීමට මුදල් මණ්ඩලය තීරණය කර ඇත.
දේශීය මූල්‍ය පද්ධතියේ වැඩි වැදගත්කමක් සහිත බැංකු (D-SIBs)සහ එසේ නො වන බැංකු සඳහා පිළිවෙලින් පදනම් අංක 100 සහ 50 බැගින් තම ප්‍රාග්ධනය සුරැකීම සඳහා ඇති අතිරික්තයන් පහත දැමීමට අවස්ථාව සලසා දීම තුළින් ආර්ථිකයට සුමට ව ණය ගලා යාමට පහසුකම් සැලසීම සහ කොරෝනා ව්‍යසනය මගින් බලපෑමට ලක්වූ ණය ගැනුම් කරුවන් හට සිය ව්‍යාපාර කටයුතු නුදුරු අනාගතය තුළ අඛණ්ඩ ව පවත්වාගෙන යාමේ හැකියාව ලබාදීම.
යම් ගනුදෙනුකරුවෙකුගේ මුළු අක්‍රිය ණය පහසුකම් ප්‍රමාණය, ඔහු වෙත ලබා දී ඇති මුළු ණය පහසුකම් ප්‍රමාණයෙන් 30% ඉක්මවන විට එම ගනුදෙනුකරු වෙත ලබා දී ඇති මුළු ණය ප්‍රමාණය ම අක්‍රිය ගණයේ ලා සැලකීමට ඇති නියාමන අවශ්‍යතාව ඉවත් කිරීම කිසියම් ණයක් විදේශ මුදලින් පියවා ගැනීමට ඇති හැකියාවක් නොමැති විටෙක, අවසාන විකල්පය වශයෙන්, බැංකු විසින් නිශ්චිත කොන්දේසි සපුරාලීම තහවුරු කිරීමට යටත් ව, එම ණය රුපියල්වලින් පියවා ගැනීමට බැංකු වෙත අවසර ලබා දීම.
වෙනත් කිසිදු සහනයක් සඳහා හිමිකම් නො ලබන ගනුදෙනුකරුවන් සඳහා මාර්තු මස තුළ දී අය වීමට නියමිත ඔවුන්ගේ ණය හා අත්තිකාරම් වාරික සඳහා දින 60ක කල් දිගුවක් ලබා දීමට බලපත්‍රලාභී බැංකු වෙත අවසර දී ඇති අතර අදාළ දින 60 අවසන් වන තුරු එම ණය පහසුකම්, ගෙවීම පැහැර හැර ඇති සේ නොසැලකිය යුතු වීම.
කොරෝනා ව්‍යසනය (කොවිඩ්-19) නිසා ගනුදෙනුකරුවන් මුහුණ පා ඇති ගැටළු හේතුවෙන් 2020.03.16 සිට 2020.06.30 දක්වා කාල සීමාව තුළ දී ණය ගිවිසුම් සහ ආපසු ගෙවීමේ කාල සීමා සඳහා කරනු ලබන සියළු වෙනස් කිරීම් ණය සහ අත්තිකාරම් වර්ගීකරණය සහ ණය හානිකරණය ගණනයේ දී ‘ප්‍රතිව්‍යුහගත’ ලෙස සැලකීම වෙනුවට ‘සංශෝධන’ ලෙස සැලකීමට බැංකු වෙත අවසර දීම.
2020 වසර අවසානය වන විට වැඩි කළ ප්‍රාග්ධන අවශ්‍යතාවන් සපුරා ගත යුතු ව තිබූ බැංකු හට එකී අවශ්‍යතා සපුරාගැනීමේ අවසාන දිනය 2022 වසර අවසානය තෙක් දීර්ඝ කිරීම.
නියාමනයේ දී හඳුනා ගත් සැලකිය යුතු කරණු නිවැරදි කිරීම සඳහා ලබා දී ඇති කාල සීමාවන් බැංකු අධීක්ෂණ දෙපාර්තමේන්තුව හා සාකච්ඡා කර ඒවායේ, වැදගත්කම/බැරෑරුම්කම සලකා බලා අවශ්‍ය නම් නැවත සකස් කිරීමට අවසර දීම.
නියාමනයේදී හඳුනාගත් කරුණු /සොයා ගැනීම් සඳහා නිවැරදි කිරීමේ ක්‍රියාමාර්ග ගැනීමේ කාල කාලසීමාව 2020 මැයි 30 දක්වා ඇති බැංකු සඳහා අමතර මාස 3 ක කාලයක් ලබාදීම.
යළි දැනුම්දෙන තුරු , බලපත්‍රලාභී බැංකු විසින් බැංකු අධීක්ෂණ දෙපාර්තමේන්තුව වෙත කාලීන ව සිදු කළ යුතු ව්‍යවස්ථාපිත වාර්තාකරණයන් සඳහා නියමිත කාල සීමාව සති දෙකකින් දීර්ඝ කිරීම සහ කාර්තුමය මූල්‍ය වාර්තා ප්‍රකාශනය සඳහා නියමිත කාල සීමාව මසකින් දීර්ඝ කිරීම.
බැංකු වෙත ලබා දුන් මෙම සහනයන් තම ගනුදෙනුකරුවන්ගේ හා සමස්ත ආර්ථිකයේ ම යහපත උදෙසා යොදා ගන්නා ලෙස ශ්‍රී ලංකා මහ බැංකුව සියලු ම බලපත්‍රලාභී බැංකු වෙතින් ඉල්ලා සිටින අතර එමගින් බැංකු ක්ෂේත්‍රයට වඩාත් ශක්තිමත් ලෙස අභියෝගවලට මුහුණ දීමට හැකියාව ලැබෙනු ඇත.
