ලේක්හවුස් පාලකයන් සේවකයන්ගේ ඔලුවට අත හොදයි

සියලුම රජයේ සේවකයන් හට රුපියල් දස දහසක වැටුප් වැඩි කිරීමක් ලබා දෙන බව කියමින් බලයට පැමිණි ජනාධිපතිවරයා සහ හයිබ්‍රිඩ් ආණ්ඩුවේ සායම සෝදා දැමූ ලේක්හවුස් පාලකයන් සොච්චම් වැටුප් වැඩි කිරීමක් ලබා දීමට සැරසීම සම්බන්ධයෙන් සේවකයන් තුළ බරපතළ විරෝධයක් හට ‍ගෙන තිබේ.

දීර්ඝ කාලයක් තිස්සේ අක්‍රීයව තිබෙන සාමූහික ගිවිසුම අත්සන් කර වැටුප් සහ දීමනා වැඩි කර ගැනීම සඳහා ලේක්හවුස් ආයතනයේ සියලු වෘත්තීය සමිති එක්ව කළ සාකච්ඡා අවසානයේ දී ලේක්හවුස් සභාපතිවරයා ඇතුළු අධ්‍යක්ෂ මණ්ඩල පවසා ඇත්තේ ඕනෑම නම් රුපියල් 305කින් වැටුප් වැඩි කළ හැකි බවය. එයද ලබන වසරේ සිටය.

එසේත් නැති නම් ලේක්හවුස්  සේවක සේවිකාවන්ගේ ජීවන වියදම් දීමනාව කප්පාදු කිරීමට එරෙහිව පවත්නා නඩුව ඉල්ලා අස් කර ගන්නේ නම් රුපියල් 750ක වැටුප් වැඩි කිරීමක් ලබා දීමට සූදානම් බව පාලනාධිකාරිය පවසා ඇත. එම නඩුව ජයග්‍රහණය කළහොත් සේවකයකුට විශාල වන්දියක් සමඟ ඉහළ ජීවන වියදම් දීමනාවක් ලැබීමට නියමිතය.

එම මුදල් ගෙවීම පැහැර හැරීම උදෙසා සභාපතිවරයා ඇතුළු අධ්‍යක්ෂ මණ්ඩලය මෙම තුරුම්පුව ගසා ඇතත් සියලු වෘත්තීය සමිති මෙන්ම සේවක සේවිකාවන්ගේ ද විරෝධය එල්ල වීමෙන් අනතුරුව 2017, 2018 වර්ෂ සඳහා පමණක් රුපියල් 750ක වැටුප් වැඩි වීමක් ලබා දීමට හැකි බවට පවසා තිබේ. එහෙත් රුපියල් 750කින් කළ හැකි ලබ්බක් නැතැයි කියමින් සේවක සේවිකාවන් ඊට විරෝධය පා තිබේ.

යම්කිසි සහනයක් ඉල්ලන සෑමවිටම ආයතනය පාඩුයි කියමින් ප්‍රතික්ෂේප කරන සභාපතිවරයා කජු කිරි කොල්ලන් සහ කෙල්ලන් ඉහළ තනතුරුවලට බඳවා ගනිමින් ලක්ෂය ඉක්ම වූ වැටුප් ගෙවීමට කටයුතු කිරීම බහුතර සේවකයන්ගේ පිළිකුලට ලක් ව ඇත. මේ වන විට එසේ ඉහළ වැටුප්වලට බඳවාගෙන ඇති සුරතලුන්ගේ සංඛ්‍යාව පනහ ද ඉක්මවා ගොස් තිබේ. ඔවුන් නඩත්තු කිරීමට පමණක් මසකට ලක්ෂ ගණනාවක් වැය කෙරේ.

රාජ්‍ය සේවකයන් හට හිමි රුපියල් දස දහස අහිමි කිරීම සම්බන්ධයෙන් සේවක සේවිකාවන් අතර මේ වන විට බරපතළ නොසන්සුන් ස්වභෘවයක් හට ගෙන ඇති අතර පසුගිය ජනාධීපතිවරණයේ දී මහින්ද රාජපක්ෂ පරාජය කිරීමට වැඩ කළ ශ්‍රී ලංකා නිදහස් පාක්ෂිකයන් මෙන්ම එක්සත් ජාතික පාක්ෂිකයන් ද විශාල ලෙස කළකිරීමෙන් පසුවන බව දැනගන්නට ඇත.