Published on: Jun 8, 2018- මරු සිරා, වැඩකාරයෙක් විය. තමා ගෙලවැළ ලා මරණයට පත් කිරීමට සිරා ඉඩ තැබුවේ නැත. මරු සිරා සිනමාවට ද ගීතය ද නැගුණි.
පොළොන්නරුවේ සිරා කතාකාරයෙකි. වැඩ්ඩෙක් නොව බව හෙතෙමේම පෙන්වා තිබේ. ඔහු ගැන හැදෙන්නේ සිනමා නොව එක පිට පතුරු යැවෙන කාටූන් ය. පොළොන්නරුවේ සිරා යන්න කෙටි කර අපට පොල් සිරා යැයි ඔහුට කීමට පුළුවන. පොල් කඩනවා යනුවෙන් කටවහරේ කියැවෙන්නේද හැරෙන හැරෙන අතට ආතක් පාතක් නැතිව වචන අැදබෑමය.
කතාවක් දීම පිනිස සිරා ඊළඟට කඩාපනින්නේ කොතැනටදැයි කීමට ශක්‍රයාටවත් බැරිය. ඒ කෙසේ වෙතත් ගොනා හැරෙන්නේ පොල් පැළයටය කියන්නා සේ පොල් සිරා ඊළඟට ජනමාධ්‍ය දෙසට හැරෙන්නට ඉඩ තිබේ.
පොල් සිරාගේ දශලක්ෂ ගණනින් වැටප් ගන්නා මලයාගේ විදුලි සංදේශ නියාමන කොමිසම විසින් ටීඑන්එල් රෑපවාහිනී විකාශණයන් අවහිර කර තිබේ. එහි හිමිකරු ශාන් වික්‍රමසිංහ අගමැති වික්‍රමසිංහගේ වැඩමහල් සහෝදරයාය. බොහෝ විචාරකයින් පෙන්වා දී ඇති පරිදි මෙම අවහිර කිරීම පසුපස ඇති සෑබෑ හේතුව විය හැක්කේ පොල් සිරා මාදුළුවාවේ සෝභිත හිමි සමරුවෙහිදී කළ පොල් පැලෙන කතාවට අැස්ටි හැලෙන්න දෙමින් ටීඑන්එල් විසින් කරන ලද වැඩ සටහනකි. මෙම අධිකරණ තීන්දුව ලබා ගෙන ඇත්තේ පොල් සිරාගේ මලයා විසිනි. ලංකා ඊ නිව්ස් ශ්‍රී ලංකාව තුල තහනම් කරන ලද්දේ ද පොල් සිරාගේ මලයා විසින් බව මතක් කර ගැනීම වටී.
ඇස්ටි හැලෙන විට පොල් සිරාගේ කන් අඩි දෙදරුම් කෑම අරුමයක් නොවේ. පොලාගේ මලා අැස්ටියා නිසාය.
ඇත්ත වශයෙන්ම නම් විදුලි සංදේශ නියාමන කොමිසම තිබිය යුත්තේ ඇමැති හරීන් ප්‍රනාන්දු යටතේය. පොල් සිරා එය තමා යටතේ තබා ගෙන සිටින්නේ සිය මළයාට දහසින් බැදි රන්මසු මාසිකව ලබා දීම පිනිස මිස වෙන මොන පොල් බෑයකට ද? විදුලි සංදේශ නියාමන කොමිසම තිබිය යුත්තේ සිය අමාත්‍යාංශය යටතේ බවට මෑතදී හරීන් ප්‍රනාන්දු කරන ලද ප්‍රකාශයට ද පොල් සිරාට පොල් උළක් මෙන් වැදී ඇතිවාට සැක නැත.
තමා විවේචනය කරමින් පළ කැරෙන ලිපි වැනි ලිපි මරාගේ කාලයේදී ලියුවේ නම් මරා සරම උස්සා එකී කතුවරුන්ට සුද්ධ සිංහලයෙන් ගොරවන්නේ යැයි පොල් සිරා කියා තිබුණි. මරාගේ කාලයේදීත් අප නම් කියන දේ කෙලින්ම කීවෙමු. අහම්බ සිදුවීමක් නිසා දිගු කළකට විදෙස් ගතවීමට සිදුවීමට පෙර 2009 මැයි මාසය දක්වාත් ඉන් පසුවත් අපි එසේ ලීවෙමු. එවැනි මාධ්‍යකරුවෝ එදා මෙන්ම අදත් සිටිති.
පොල් සිරාගේ ප්‍රශ්ණය තමන්ගේ ඇහේ තියෙන පොල් පරාළය නොදැක අනුන්ගේ පොල් කෙඳි සොයන්නට යෑමය. ළගදී පොල් සිරා කියා තිබුණේ සමාජ මාධ්‍ය ජාල සම්පූර්ණයෙන්ම තහනම් කිරීමට තමන්ට සිදුවිය හැකි බවයි. පොල් සිරාට තමන්ගේ සංනිවේදනය ක්‍රියාකාරකම් ගොඩ දමා ගැනීමට බැරිය. ප්‍රශ්ණය එයයි.
පොල් සිරා විසින් එක දිගට ප්‍රහාරයන් එල්ල කරන ලද මෙරට ප්‍රජාතන්ත්‍රවාදී සංස්ථාවක් වේ නම් ඒ ජනමාධ්‍ය යයි.
වත්මන් සමාජයට නැතිවම බැරි දෙයක් බවට පත්ව ඇති සමාජ ජාල සංනිවේදනයෙහි හොඳ මෙන්ම නරකද තිබේ. එනමුත් එය ප්‍රජාතන්ත්‍රවාදයේ සීමාතුළ තහනම් කිරීමෙන් වඳකළ හැකි නොහැකිය. හරියට වයිරසයක් මෙනි. අයහපත් සමාජ ජාල සංනිවේදනය පැරදවිය හැක්කේ යහපත් සංන්වේදනය මගිනි.එසේ නැත්නම් චීනයේ හෝ ඉරානයේ හෝ මෙන් අන්තර් ජාලය පමණක් නොව සමස්ත සමාජය දරුණූ පාලනයකට ලක් කිරීම මගිනි. එවැනි පියවරක් ගැනීමට පොල් සිරාට හයිියක් නැත. නමුත් එවැනි දරුණූ පාලනයක් සඳහා සහය වන මතවාදයක් ගොඩ නැගීමට පොල් සිරාට හැකියාවක් තිබේ.
තමා බලයට පත් කළ බලවේග අතර අද මෙරට අතර වඩාම අප්‍රසාදයට පත් දේශපාලනඥයකු වේ නම් ඒ පොල් සිරාය. ඊට හේතුව නම් තමන් බලයට පත් කරන ලද බලවේගයන්ට පහරදීම දැන් පොල් සිරාගේ මූලික කාරිය වී ඇති නිසාය. පොල් සිරාගේ ජනප්‍රියත්වය මැන බැලෙන සමීක්ෂනයක් කල හොත් මේ බව සනාථ වනු නිසැකය.
පොල් සිරාගේ නූතන පොල් කැඩීමක් ගැන සති අන්ත පුවත් පතක් විසින් අසනු ලදුව මරා කියා තිබුනේ ‘ දැන් ඉතිං මට ජන්දෙට මැරීගෙන වැඩ කරන්න ඕන නැහැ. සිරා ඒක කරගෙන යනවා’ කියාය.
සති අන්ත සන්ඩේ ටයිම්ස් පුවත්පත පොල් සිරාගේ වත්මන් පොල් කැඩීම් ගැන ලියමින් කියා තිබුණේ ‘ රටේ වානිජ්‍ය, වෙළදාම් සහ කර්මාන්ත ක්ෂේත්‍රවල නියැලී සිටින්නෝ පසුවන්නේ ජනපති සිරිසේන කරේ උපන් කෝපයකිනි. පසුගියදා කළ ප්‍රකාශයේ ප්‍රතිඵලයක් ලෙස ජනපති සිරිසේනගේ ප්‍රතිරූපය සහ විශ්වසනීයත්වය දරුණු සෝදාපාලුවකට ලක්ව තිබේ. රටේ ජනපතිවරයා ලෙස නොපෙන්විය යුතුව තිබෙන දුර්වලතා රැසක් මෛත්‍රීපාල සිරිසේන චරිතයේ පවතින බව මෙහි දී මනාව පැහැදිලි විය’ ( ලංකාදීප පරිවර්ථනය) කියාය.
දෙමළ ජාතික සන්ධානයේ නායක ආර්. සම්පන්දන් පසුගියදා මෙරටට පැමිණි නිල ඇමෙරිකානු දූත පිරිසක් හමුවී කීවේ ‘ නිශ්චිත කාල සීමාවක් තුළ දේශපාලන විසඳුමක් අඩංඟු නව ව්‍යවස්ථා ප්‍රතිසංසකරණයක් සිදු නොවේ නම් තමන්ට අලුතින් හිතන්නට සිදුවන බවයි.’ ඉන් අදහස් කැරුණේ සාකච්ජාමය විසඳුමක් සඳහා දැනට දෙමළ සන්ධානය ගෙනයන දේශපාලනය වෙනුවට අරගලයේ මාවතට ගමන් කිරීමට සිදුවන බවයි. අරගලය යනු සන්නද්ධ අරගලයක් නොව ප්‍රජාතන්ත්‍රවාදී සටන් ක්‍රියාමාර්ගයන්ය.
දේශපාලන විසඳුම අතහැරීම පොල් සිරා විසින් කරන ලද ලොකුම පාවාදීමයි.
දූරදර්ශී දේශපාලනයඥයකු ලෙස ඉතිහාස ගතවීමට ලද අවකාශය පිරවීමට පොල් සිරාට දේශපාලන අධිශ්ඨානයක් නොතිබුණි. රට පුරා බයිලා ගැසීම වෙනුවට නව ව්‍යවස්ථාවක් ගෙන ඒම සිය මූලික පිළිවෙත කර ගත්තේ නම් පොල් සිරාට ඇත්ත පොරක් වීමට මහඟු අවස්ථාවක් 2015 ජනවාරියේදී විවිර විය. පොල් සිරා එයට පයින් ගැසුවේය.
එල්ටීටීඊ සමඟ යුද වැදුණූ මරා, ප්‍රභාකරන්කරණය වූයේ යුද ජය මිස මිනිස්කම නොසැළකීම මගිනි. එය හරියට පුරාවෘත්ත ගත, මිනිසුන් මරා කෑ බිහිසුණූ මකරා සමඟ සටන් වැදීමට ගොස් එවැනිම මකරකු බවට පත් වීරයාගේ කතාව වැනිය. දැන් පොල් සිරාද රෑපාන්තණය වෙමින් යයි.
පොල් සිරා දැන් ව්‍යවස්ථා වෙනස ගැන පොල් කඩන්නේ නැත. ඒ වෙනුවට පසුුගිය මැයි 18වනදා පෙනීගියේ යුදවාදය සහ රණවිරු දේශපාලනය සිරාගේ දේශපාලනය බවට පත්වෙමින් ඇති බවයි. සිරා, මරා බවට පත්වන දේශපාලන පිල්මාරුවෙහි කේන්ද්‍රය ඇත්තේ එතැනය.
මේ අතර වාරයේ විහිලු කතාද අසන්නට ලැබේ. එකක් නම් මරාගේ දේශපාලනඥයකු වූ දයාන් ජයතිලක පොල් සිරා විසින් රුසියානු තානාපති ලෙස පත් කරන්නට යන්නේය යන්නයි. එවැනිම තවත් එකක් නම් 2020 ජනාධිපතිවරණයෙන් පොල් සිරා දිනවීමට ශ්‍රීලනිපය තීරණය කර ඇති බවයි. තවත් එකක් නම් සිරා – මරා සන්ධානය ගෝටා හරහා සිදුවෙමින් ඇති බවයි. කිසිදු රාජපක්ෂවරයකු සිරගත නොකැරෙන බවට සිරා පොරොන්දුවක් දී ඇති බව ද කියැවෙයි.
විහිළු අැත්ත වන්නේ ඛේදවාචක ලෙසය. ඉන් ලොකුම ඛේදවාචකය සිරා, මරා බවට පත්වීමයි. මන්ද යත් මරාගේ තැන කිසිසේත්ම පොල් සිරාට ගත නොහැකි නිසාය. මේ වනාහී උත්තරය ශූන්‍ය බවට පත්වන ඛේදවාචකමය දේශපාලන රූපාන්තරණයකි.
~~සුනන්ද දේශප්‍රිය~~
