ඇමරිකානු නියෝජිත මන්ත්‍රී මණ්ඩලය සම්මත කළ TikTok පනත සාධාරණත්වයෙන් තොර පනතක් බව චීනය පවසයි. එම පනතට අනුව, චීනයේ ByteDance සමාගම සිය TikTok මෘදුකාංගය පාලනය කිරීමෙන් ඉවත් නොකරන්නේ නම් ඇමරිකාව තුළ TikTok භාවිතය තහනම් කිරීමට ඇමරිකාව පියවර ගනු ඇති බව සඳහන් වේ. චීන විදේශ අමාත්‍යංශ ප්‍රකාශක Wang Wenbin මහතා අද(14) පැවති නිත්‍ය මාධ්‍ය හමුවේදී එම පනතට විරෝධය පළ කරමින් අදහස් ප්‍රකාශ කළේය.
ඇමරිකාවේ මෙම ක්‍රියාවලිය සාධාරණ තරඟකාරිත්වයේ මූලධර්මය සහ ජාත්‍යන්තර ආර්ථීක හා වෙළඳ න්‍යාය උල්ලංඝනය කිරීමක් බව චීනය පවසයි. ජාතික ආරක්ෂාව සුරැකීමේ නාමයෙන්, කිසිදු සාධාරණ හේතුවකින් තොරව සෙසු රටවල දියුණු සමාගම් මෙලෙස මර්දනය කිරීම සම්පූර්ණයෙන්ම සාධාරණත්වයෙන් තොර ක්‍රියාවලියක් බවයි චීනය පවසන්නේ.
රාමසාන් සමයේදී ගාසා තීරයේ සහ සුඩානයේ සතුරුකම් නතර කරන ලෙස එක්සත් ජාතීන්ගේ මහලේකම් António Guterres මහතා ඊයේ(11) ඉල්ලා සිටියේය.
රාමසාන් මාසය ලොව පුරා සිටින මුස්ලිම්වරුන්ට සාමය, සංහිඳියාව සහ සමගිය වෙනුවෙන් පෙනී සිටින මාසය බව Guterres මහතා පැවසීය. රාමසාන් උපවාසයේ ආරම්භය නිමිත්තෙන් නිව්යෝර්ක් නුවර එක්සත් ජාතීන්ගේ මූලස්ථානයේ පැවති මාධ්‍ය හමුවකදී ඔහු මේ බව පැවසීය.
රාමසාන් මාසය පැමිණ ඇතත් ගාසා තීරයේ ඝාතන, බෝම්බ හෙලීම සහ ලේ වැගිරීම් අඛණ්ඩව පවතී. ගාසා තීරයේ සටන් විරාමයක් ක්‍රියාත්මක කරන ලෙසත්, මානුෂීය සහන සඳහා ඇති සියලු බාධා ඉවත් කරන ලෙසත්, රඳවාගෙන සිටින සියලු දෙනා නිදහස් කරන ලෙසත් ඔහු ඉල්ලා සිටියේ ය. එමෙන්ම, රාමසාන් සමයේදී සතුරුකම් නතර කරන ලෙස ඔහු නැවතත් සුඩානයේ ගැටුම් පාර්ශවයන්ගෙන් ඉල්ලා සිටියේය.
මෙම වසරේ මුල් මාස දෙකේ, චීනයේ වාහන අපනයනය කැපීපෙනෙන වර්ධනයක් වාර්තා කරයි. එය පසුගිය වසරේ අදාළ කාලසීමාවට සාපේක්ෂව 30% ක වැඩිවීමකි.
චීන වාහන කර්මාන්ත සංගමය ඊයේ (11) මේ බව පැවසීය.
ජනවාරි, පෙබරවාරි මාස දෙකේ චීනයේ වාහන අපනයන පරිමාව 8 ලක්ෂ 22000 ක් වන අතර, එය පසුගිය වසරට වඩා 30.5% ක වර්ධනයක් බව එම සංගමය නිකුත් කළ දත්තවල දැක්වේ. නව බලශක්ති වාහන එක් ලක්ෂ 82000 ක් ද ඊට ඇතුළත් ය. එය පසුගිය වසරේ අදාළ කාලසීමාවට සාපේක්ෂව 7.5% ක වර්ධනයකි. එසේම සාම්ප්‍රදායික ඉන්ධන වාහන අපනයනය 6 ලක්ෂ 40000 ක් වන අතර, එය 39% ක වර්ධනයක් වාර්තා කර ඇත.
චීන මෝටර් රථවල තරඟකාරිත්වය මෙන්ම විදේශීය වෙළෙඳපොළ ඉල්ලුම ද අඛණ්ඩව පුළුල් වෙමින් පවතී. 2024 වසරේ දී ජාත්‍යන්තර ආර්ථික හා වෙළඳ තත්ත්වය වර්ධනය වීමත් සමඟ චීනයේ මෝටර් රථ අපනයනය වේගවත් වර්ධනයක් පවත්වාගෙන යනු ඇතැයි චීන වාහන කර්මාන්ත සංගමය කියාසිටී. එම වර්ධන වේගය 20% ක පමණ අගයක පවතිනු ඇති බවට ද ඇස්තමේන්තු කර ඇත.
හයිටි ජනරජයේ ආරක්ෂක තත්ත්වය තවදුරටත් නරක අතට හැරේ. එහි තුන්ලක්ෂ හැටදහසකට අධික ජනතාව අවතැන් ව සිටින බවත්, ඉන් අඩකට වැඩි පිරිස දරුවන් වන බවත් ජාත්‍යන්තර ආගමන සංවිධානය පසුගිය දා නිවේදනය කළේය.
මේ වනවිට එරට අවතැන්ව සිටින සංඛ්‍යාව වසර ආරම්භයේ පැවති අගයට වඩා 15% කින් වැඩි වී ඇතැයි එම සංවිධානය පවසයි. පෝට්-ඕ-ප්‍රින්ස් අගනුවර එක්ලක්ෂ හැටදහසකට වැඩි පිරිසක් සිය නිවාසවලින් බැහැර ව සිටිති. පසුගිය පෙබරවාරි මාසය අවසානයේ සිට මේ දක්වා එරට අභ්‍යන්තර ප්‍රචණ්ඩකාරී සිදුවීම් සැලකිය යුතු අයුරින් වර්ධනය වී තිබේ. නගර වැසියන් සන්නද්ධ කල්ලි විසින් හිර කරනු ලැබ ඇතැයි ද ජාත්‍යන්තර ආගමන සංවිධානය කියා සිටී.
2021 වසරේ ජූලි 7 වැනි දා, හයිටි රාජ්‍යයේ ජනාධිපති Jovenel Moïse මහතා ඝාතනයට ලක්විය. ප්‍රචණ්ඩකාරී කල්ලිවල ක්‍රියාකාරීත්වය ඉන් අනතුරුව බෙහෙවින් ඉස්මතු වී තිබේ. පසුගිය 29 වැනි දා සිට එවැනි සන්නද්ධ කණ්ඩායම් අවස්ථා ගණනාවක දී එරට වැදගත් ආයතන හා යටිතල පහසුකම්වලට ප්‍රහාර එල්ල කර ඇත.
චීනයේ 46වන රුක්රෝපණ දිනය අදට (12) යෙදී තිබේ. රුක්රෝපණ දිනය නිමිති කරගෙන චීන ජාතික හරිතකරණ කොමිසම වාර්තාවක් නිකුත් කර ඇත. 2023 වසරේ චීනයේ කඳු, ගංගා, වනාන්තර, ගොවි බිම්, වැව්, තණ බිම් හා කාන්තාරවල ආරක්ෂාව හා කළමනාකරණය ඒකාබද්ධව ඉදිරියට ගෙනයමින් පරිසර හරිතකරණය සාර්ථක ව ක්‍රියාත්මක කර ඇතැයි එම වාර්තාවේ සඳහන් වේ. ඒ අනුව 2023 වසරේ අක්කර මිලියන 10ක පමණ ඉඩම්වල රුක්රෝපණය සිදු කර ඇති අතර තණ වගා කිරීමෙන් අක්කර මිලියන 11ක පමණ ඉඩම්වල ගුණාත්මකභාවය ඉහළ නංවාලීමට ද චීනය සමත් වී ඇත. එම කාලයේ අක්කර මිලියන 5ක පමණ කාන්තාර ප්‍රදේශ හරිතකරණය කර ඇත. එමෙන් ම චීනය ජාතික මට්ටමින් ජෛව පද්ධතිය සංරක්ෂණ කිරීමේ ව්‍යාපෘති 96ක් ද ඉඩම් හරිතකරණය කිරීමේ ආදර්ශ ව්‍යාපෘති 25ක් ද ක්‍රියාත්මක කළ බව එම වාර්තාවෙන් පෙන්වා දෙයි.
14 වැනි චීන ජාතික මහජන කොංග්‍රසයේ දෙවැනි සැසිවාරය සාර්ථකව නිමාවට පත්වෙයි. සමාප්ති උළෙල අද (11) පස්වරුවේ බෙයිජිං අගනුවර මහජන මහා ශාලාවේ දී පැවැත්විණ. එය ආරම්භ වූයේ ඉකුත් 5 වැනිදා යි.
චීන ජනාධිපති ෂී ජින්පිං මහතා ඇතුළු චීන කොමියුනිස්ට් පක්ෂයේ හා රජයේ නායකයන් මෙන්ම ජාතික මහජන කොංග්‍රසයේ නියෝජිතයන් 2900ක පමණ පිරිසක් මෙවර සැසිවාරයට එක්වූ අතර චීන අග්‍රාමාත්‍යවරයා සමුළුව ආරම්භයේ දී ඉදිරිපත් කළ රාජ්‍ය කාර්ය වාර්තාව දෙස් විදෙස් ඉහළ අවධානයට ලක්විය. කලාපීය අනන්‍යතාවට ගැලපෙන පරිදි නව ගුණාත්මක ඵලදායිතාව සහතික කිරීමේ අවශ්‍යතාව මෙවර සැසිවාරයේ දී අවධාරණය කෙරිණ. සැසිවාරයට සහභාගි වූ පළාත් නියෝජිත හමුවලට එක් වූ චීන ජනාධිපතිවරයා රට පුරා පවතින විවිධ මට්ටම්වල පරිපාලනයන් රටේ සැබෑ තත්ත්වයන්ට සරිලන අයුරින්, නවීන ක්‍රමවේද ඔස්සේ ක්‍රියාවට නැංවිය යුතු බව ද පෙන්වා දී ඇත.
චීන අනන්‍යතාව සහිත නවීකරණ ක්‍රියාවලිය හා ජාතික පුනර්ජීවනය ඉදිරියට ගෙන යාමේ දී නව ක්ෂේත්‍රවල උපායමාර්ගික හැකියාව ඉහළ නැංවීමේ වැදගත්කම ද මෙවර ප්‍රමුඛ අවධානය දිනාගත් කරුණකි. විවිධ බාහිර හා අභ්‍යන්තර අභියෝග මධ්‍යයේ වුව ද සිය ඉලක්ක සපුරා ගැනීම සඳහා චීන කොමියුනිස්ට් පක්ෂය ප්‍රමුඛ චීන රජයේ ඇති අධිෂ්ඨානය මෙම නවීකරණ අදහස් තුළින් තවදුරටත් පිළිබිඹු වන බව විචාරකයන් විසින් ද පෙන්වා දෙනු ලැබ ඇත.
ඊශ්‍රායලය විසින් අත්පත් කර ගැනුණු ජෝර්දාන ග‍ඟේ බටහිර ඉවුරේ පදිංචි කෙරෙන ජනතාව වෙනුවෙන් නව නිවාස 3426 ක් ඉදිකිරීමට ඊශ්‍රායලයේ ඉහළම සැලසුම් කවුන්සිලයේ අනුමැතිය හිමිවෙයි. ඊයේ (6) මෙම අනුමැතිය ලබා දී ඇතැයි එරට බලධාරීහු පවසති.
ඊශ්‍රායල මුදල් අමාත්‍ය Bezalel Smotrich මහතා වෙනුවට නිකුත් කෙරුණු නිවේදනයක දැක්වෙන්නේ පසුගිය මාර්තු මාසයේ සිට ඊශ්‍රායලය නව නිවාස ඒකක 18,515ක් අනුමත කර ඇති බවයි. එම ජනාවාසවල ප්‍රවාහන යටිතල පහසුකම්, රැකියා සහ ජීවන තත්ත්වය සංවර්ධනය සඳහා රජය පුළුල් ආයෝජනයක් කර ඇති බව ද අමාත්‍යවරයා පවසා ඇත.
මෙම ජනාවාස නීති විරෝධී සහ සාමයට විශාල බාධාවක් වනු ඇතැයි යන්න ජාත්‍යන්තර ප්‍රජාවේ බහුතර මතය වී තිබේ. ඊට හේතුව පලස්තීනුවන් තම අනාගත රාජ්‍යය ගොඩනැගීමට අපේක්ෂා කරන ප්‍රදේශය බටහිර ඉවුරේ සහ නැගෙනහිර ජෙරුසලමේ පිහිටා ඇති බැවිනි.
අධ්‍යයන පොදු සහතික පත්‍ර සාමාන්‍ය පෙළ විභාගයට පෙනී සිටීමෙන් පසු පදනම් විභාගයකට මුහුණ දීමෙන් අනතුරුව රාජ්‍ය විශ්වවිද්‍යාලයකට ඇතුළු විය හැකි ක්‍රමවේදයක් දරුවන්ට හඳුන්වා දීම පිළිබඳව ඉදිරියේදී සලකා බලන බව අධ්‍යාපන අමාත්‍ය සුසිල් ප්‍රේමජයන්ත මහතා ඊයේ(5) පාර්ලිමේන්තුවේදී පැවසීය.
අධ්‍යාපන ප්‍රතිපත්ති රාමුව තුළ ද මේ පිළිබඳව සඳහන් ව තිබේ. ඉදිරියේදී පැවැත්වෙන අධ්‍යාපනය පිළිබඳ ආංශික අධීක්ෂණ කාරක සභාවේදී මේ සම්බන්ධයෙන් තීන්දුවක් ගැනීමට නියමිත බව ද අධ්‍යාපන අමාත්‍යවරයා ප්‍රකාශ කර ඇත.
පළාත් මට්ටමින් සියලු ප්‍රාථමික අංශ සිසුන්ට ආහාර ලබා දීමට රුපියල් බිලියන 16.6ක මුදලක් කැබිනට් මණ්ඩලය විසින් අනුමත කර ඇති අතර එළඹෙන සතියේ දී එම චක්‍රලේඛය නිකුත් කිරීමට නියමිත බව ද අධ්‍යාපන අමාත්‍යවරයා කීය.
මානුෂීය ආධාර සැපයීමට පහසුවෙන් ඇතුළු විය හැකි ලෙස සහ දැඩි මානුෂීය අර්බුදය සමනය කිරීමට ගාසා තීරයේ ගොඩබිම් ප්‍රවේශය විවෘත කරන ලෙස ඊයේ(06) එක්සත් ජාතීන්ගේ ලෝක ආහාර වැඩසටහන ඊශ්‍රායලයෙන් ඉල්ලා සිටියේ ය.
එම සංවිධානයට ගාසා හි සියලු වැසියන්ට ප්‍රමාණවත් ආහාර ලබා දිය හැකි වුව ද ආහාර බෙදා හැරීමේ රථ ඊශ්‍රායල හමුදාව රඳවා ගන්නා බැවින් ගාසා තීරයට ඇතුළු වීමට නොහැකි වූ බව ලෝක ආහාර වැඩසටහනේ හදිසි මෙහෙයුම් කටයුතු පිළිබඳ අධ්‍යක්ෂ Samer AbdelJaber මහතා පැවසීය.
මෑතකදී ගාසා තීරයට සංකේතාත්මක ගුවන් ආධාර පමණක් ලැබුන අතර, ගාසා තීරයේ ජනතාවට ප්‍රමාණවත් සහ තිරසර ලෙස ආහාර සැපයීමට ඇති එකම පහසු මාර්ගය ගොඩබිම් ප්‍රවේශය බවත් හෙතෙම අවධාරණය කර ඇත.
චීන ජනාධිපති ෂී ජින් පිං මහතා චීන මහජන දේශපාලන උපදේශක සභාවේ 14වැනි ජාතික කමිටුවේ 2වැනි සැසිවාරයට එක්ව සිටින සාමාජිකයන් හමු වේ.
එම සැසිවාරය මේ දිනවල බෙයිජිං අගනුවර මහජන මහ ශාලාවේදී පැවැත්වේ. එම හමුව ඊයේ (6) සවස පැවැත්විණ. එහිදී චීන ප්‍රජාතාන්ත්‍රික පක්ෂයක් වන චීන කොමින්තාන් විප්ලවීය කමිටුවේ සාමාජිකයන්, විද්‍යා තාක්ෂණ හා පරිසර සම්පත් ක්ෂේත්‍රවල නියෝජිතයන්ගෙන් සමන්විත සාකච්ඡා කණ්ඩායමට එක් වූ ජනාධිපතිවරයා ඔවුන් සමග අදහස් හුවමාරු කර ගත්තේ ය. චීන ලක්ෂණයෙන් යුත් නවීකරණ ක්‍රියාවලියට ක්‍රියාශීලි ව එක් වෙමින් රටේ සංවර්ධනයට ඉවහල් වන අදහස් හා යෝජනා ඉදිරිපත් කරන ලෙස හෙතෙම එහිදී ඔවුන්ගෙන් ඉල්ලීමක් ද කර තිබේ.
සාමාජිකයන් හය දෙනෙකුගේ දේශනවලට සවන් දීමෙන් පසු ෂී ජින් පිං මහතා වැදගත් ප්‍රකාශයක් ඉදිරිපත් කළේය. චීන මහජන දේශපාලන උපදේශක සභාවේ ජාතික කමිටු සාමාජිකයන් ගතවූ වසරේ කාර්යභාරය සපුරා ඇතැයි හෙතෙම එහිදී පැවසීය.
මෙවර හමුවේ දී ෂී ජින් පිං මහතා චීන කොමින්තාන් විප්ලවීය කමිටුව කෙරෙහි තබා ඇති අපේක්ෂාවන් විග්‍රහ කළේය. දෙස් විදෙස් වශයෙන් සහ තායිවාන දූපතේ හා ඉන් පිටත වෙසෙන, සියලු චීන දේශප්‍රේමී බලවේග සමඟ එක්ව ඊනියා “තායිවාන ස්වාධීනත්වය”ට විරෝධය පළ කරමින්, රට එක්සත් කිරීමේ ශක්තිය අඛණ්ඩව තහවුරු කිරීමේ ක්‍රියාදාමය ඒකාබද්ධව ප්‍රවර්ධනය කළ යුතු බව ජනාධිපතිවරයා කියාසිටියේය.
මීට අමතරව, විද්‍යා තාක්ෂණ හා පරිසර සම්පත් ක්ෂේත්‍රවල සාමාජිකයන් වෙත පැවරෙන වගකීම් ද එහිදී ෂී ජින් පිං මහතා පැහැදිලි කළේය. විද්‍යා තාක්ෂණ මෙන්ම නිපුණතා සංවර්ධන පද්ධතිවල ප්‍රතිසංස්කරණ සඳහා සහාය දිය යුතු බවත්, විවිධ නවෝත්පාදන ශක්තීන් හා සැඟවුණු කුසලතා දිරිගැන්වීම සඳහා විද්‍යා තාක්ෂණ තක්සේරු කිරීම් පද්ධතිය ශක්තිමත් කළ යුතු බවත් හෙතෙම පැවසීය.
එසේම, පරිසර සම්පත් ක්ෂේත්‍රයේ සාමාජිකයන් ජෛව පරිසරය සුරක්ෂිත කිරීම හා මනා ආරක්ෂණයක් සහිත උසස් මට්ටමේ සංවර්ධනයට කැප වී නව ජයග්‍රහණ ලබා ගත යුතු බවද ෂී ජින් පිං මහතා අවධාරණය කළේය.
චීන ජනාධිපති ෂී ජින් පිං මහතා චීන කාන්තාවන්ට සුබ පැතුම් පිරිනමයි. එළඹෙන ජාත්‍යන්තර කාන්තා දිනය නිමිති කරගෙන හෙතෙම අද (6) චීන කොමියුනිස්ට් පක්ෂ මධ්‍යම කාරක සභාව නියෝජනය කරමින්, බෙයිජිං හි පැවැත්වෙන චීන ජාතික මහජන කොංග්‍රසයේ වාර්ෂික සැසිවාරයට හා චීන මහජන දේශපාලන උපදේශක සභාවේ ජාතික කමිටුවේ වාර්ෂික සැසිවාරයට එක්ව සිටින කාන්තා නියෝජිතයන් ඇතුළු රටේ විවිධ ජාතීන්ගේ කාන්තාවන්, හොංකොං, මැකව් විශේෂ පරිපාලන කලාපවල හා තායිවාන ස්වදේශක කාන්තාවන්, විදේශගත වී ආපසු මව්රටට පැමිණි කාන්තාවන් වෙත එසේ සුබ පැතුම් පිරිනමා ඇත
කලාපීය අනන්‍යතාවට ගැලපෙන පරිදි නව ගුණාත්මක ඵලදායිතාව සහතික කිරීමේ අවශ්‍යතාව චීන ජනාධිපති ෂී ජින්පිං මහතා අවධාරණය කරනවා.
ජනාධිපති ෂී ජින්පිං මහතා මේ බව පැවසුවේ, මේ දිනවල පැවැත්වෙන 14 වැනි චීන ජාතික මහජන කොංග්‍රසයේ දෙවැනි සැසිවාරයට එක්ව සිටින Jiangsu පළාතේ නියෝජිත කණ්ඩායම සමග ඊයේ (05) පැවති සාකච්ඡාවට එක්වෙමින්.
චීනය පුරා විවිධ මට්ටම්වල පරිපාලනයන් සිය සැබෑ තත්ත්වයන්ට සරිලන අයුරින්, පැරණි ක්‍රමවේද අත්හැර නව ක්‍රමවේද අනුගමනය කළ යුතු බව මෙහි දී චීන ජනාධිපතිවරයා පෙන්වා දී තිබෙනවා.
නව තාක්ෂණික ක්‍රමවේද යාවත්කාලීන කර, සාම්ප්‍රදායික කර්මාන්තවල සංවර්ධනය තහවුරු කළ යුතු බව ද ෂී ජින්පිං මහතා එහිදී වැඩිදුරටත් ප්‍රකාශ කළ බවයි වාර්තා වන්නේ.
