චීන කොමියුනිස්ට් පක්ෂයේ මධ්‍යම කාරක සභාවේ දේශපාලන කාර්යාංශයේ ඊයේ(29) පැවති නව බලශක්ති සම්පත් තාක්ෂණය හා දේශීය සම්පත් සුරක්ෂිතභාවය සම්බන්ධ 12 වැනි සමූහ අධ්‍ය‍යනයේ මුලසුන දරමින් ෂී ජින්පිං මහතා මේ බව සඳහන් කළේ ය.
චීන ලක්ෂණයන් සහිත නවීකරණය ඔස්සේ ආරක්ෂිත සහ විශ්වසනීය බලශක්ති ප්‍රවේශයක් සහතික කරමින් පිරිසිදු සුන්දර ලෝකයක් නිර්මාණය කිරීමට වැඩි දායකත්වයක් ලබා දිය යුතු බව ද ජනාධිපතිවරයා එහිදී ප්‍රකාශ කර ඇත.
චීනය සුළං බලයෙන්, ප්‍රකාශ වෝල්ටීයතා හැකියාවෙන් සහ අනෙකුත් සම්පත්වලින් පොහොසත් බවත්, නව බලශක්ති සම්පත් වර්ධනය කිරීමට විශාල හැකියාවක් ඇති බවත් හෙතෙම පැවසීය. නව බලශක්ති සම්පත් සංවර්ධනය හා චීන ජාතික සම්පත් සුරක්ෂිතභාවය සම්බන්ධීකරණය කර නව බලශක්ති හා සාම්ප්‍රදායික බලශක්ති අතර සම්බන්ධතාවය, රටේ සමස්ත තත්ත්වය සහ අදාළ ක්ෂේත්‍ර, රජය හා වෙළඳපොල, බලශක්ති සංවර්ධනය හා සංරක්ෂණය යන කරුණු නිසි අයුරින් කළමනාකරණය කළ යුතු බව ද හෙතෙම සඳහන් කළේය.
එමෙන්ම නව බලශක්ති සම්පත් තාක්ෂණයේ සහ නවෝත්පාදනයේ ජාත්‍යන්තර සහයෝගීතාව තහවුරු කළ යුතු ය. ජාත්‍යන්තර බලශක්ති පාලන ප්‍රතිසංස්කරණයට වඩා පුළුල් සහභාගිත්වයක් ලබා දෙමින් සාධාරණ, යුක්තිසහගත සහ සමතුලිත ප්‍රවේශයක් ඔස්සේ පොදු ජයග්‍රහණ ලබා ගත හැකි ගෝලීය බලශක්ති සම්පත් පාලන පද්ධතියක් ගොඩනැගීමේ අවශ්‍යතාව ද ෂී ජින් පිං මහතා එහිදී පෙන්වා දුන්නේය.
ඊශ්‍රායලය හා පලස්තීනය අතර සටන් විරාමයක් කඩිනමින් ක්‍රියාත්මක කිරීම ජගත් ප්‍රජාවේ පොදු අභිලාෂයක් බව චීනය පවසයි. එක්සත් ජාතීන්ගේ මානව හිමිකම් කවුන්සිලයේ 55වන සමුළුවට එක් වෙමින් චීන නියෝජිත චෙන් ශියු මහතා ඊයේ (29) ඊශ්‍රායල-පලස්තීන අර්බුදය පිළිබඳ චීන ස්ථාවරය පැහැදිලි කළේ ය.
දැනට ගාසා තීරයේ පෙර නොවූ විරූ මානුෂීය ව්‍යසන සිදු වෙමින් පවතී. එහි වහාම සටන් විරාමයක් ක්‍රියාත්මක කිරීම, සාමය පුනරුත්ථාපනය කිරීමේ මූලික කොන්දේසිය මෙන් ම ජගත් ප්‍රජාවේ පොදු අභිලාෂයක් බව එක්සත් ජාතීන්ගේ ජිනීවා කාර්යාලයේ හා ස්විට්සර්ලන්තයේ එක්සත් ජාතීන්ගේ සෙසු ජගත් සංවිධානවල චීන නියෝජිත චෙන් ශියු මහතා කියා සිටියේ ය. ගාසා තීරයේ මානුෂීය මෙහෙයුම් සිදු කිරීමට අවශ්‍ය පහසුකම් ලබා දෙන ලෙසත්, ජාත්‍යන්තර අධිකරණය නිකුත් කළ සටන් විරාමය පිළිබඳ නියෝග ක්‍රියාත්මක කරන ලෙසත්, ඔහු ඊශ්‍රායලයෙන් ඉල්ලීමක් කර ඇත. පලස්තීන භූමිය ආක්‍රමණය කිරීමටත් පලස්තීන ජනතාව බලහත්කාරයෙන් පිටුවහල් කිරීමටත් චීනය තරයේ විරුද්ධ වන බව ද චීන නියෝජිතවරයා අවධාරණය කළේ ය.
ගාසා තීරයේ ගැටුම් සම්බන්ධයෙන් එක්සත් ජාතීන්ගේ මහලේකම්වරයාගේ ප්‍රකාශක ඊයේ(29) නිවේදනයක් නිකුත් කරමින් කියාසිටියේ එම ගැටුම් හේතුවෙන් සිදු වන බිහිසුණු මිනිස් ඝාතන පිළිබඳ දැඩි ලෙස කම්පනයට පත්වන බවයි.
අද(01) උතුරු ගාසා තීරයේ දී ජීවිත ආධාර සොයමින් සිටි සිවිල් පුද්ගලයින් 100 කට වැඩි පිරිසක් මිය ගොස් හෝ තුවාල ලැබූ බවට වාර්තා වන සිද්ධිය ද මහලේකම් António Guterres මහතා හෙළා දකියි. සතියකට වැඩි කාලයක් තිස්සේ එක්සත් ජාතීන්ගේ සංවිධානයට සහන සැපයීමේ කටයුතු සිදු කිරීමට නොහැකි වීම හේතුවෙන් යටත් කර ගත් උතුරු ගාසා තීරය ඇතුළු ප්‍රදේශවල සිටින අතරමං වූ සිවිල් වැසියන්‍ට හදිසි උපකාර අවශ්‍ය බව ද හෙතෙම සඳහන් කර ඇත.
ගාසා නගරය ආසන්න ප්‍රදේශයේ මානුෂීය ආධාර අපේක්ෂාවෙන් සිටි පුද්ගලයින් පිරිසකට ඊයේ(29) ඊශ්‍රායල හමුදාව එල්ල කළ ප්‍රහාරයෙන් අවම වශයෙන් පුද්ගලයන් 104 දෙනෙකු ජීවිතක්ෂයට පත්ව තිබේ.
මේ අතර, එක්සත් ජාතීන්ගේ මානුෂීය කටයුතු පිළිබඳ සම්බන්ධීකරණ කාර්යාලය (OCHA) ගාසා තීරයේ සාගතයක් ඇති වීමේ අවදානම පිළිබඳව ඊයේ (29) අනතුරු ඇඟවීමක් ද කර ඇත. ගාසා තීරයේ දරුවන් සහ ගර්භනී කාන්තාවන් සාගින්නෙන් මිය යාමේ අවදානමක් පවතින බවත්, ප්‍රමාණවත් ජලය, සනීපාරක්ෂක සහ සෞඛ්‍ය පහසුකම් නොමැති වීම, විදුලිය සහ ඉන්ධන සැපයුම අත්හිටුවීම මෙන්ම ආහාර නිෂ්පාදන හා කෘෂිකර්මාන්තය කටයුතු අඩපණ වී ඇති බවත් එම කාර්යාලයේ නවතම වාර්තාවෙන් පෙන්වා දෙයි.
චීන මහජන දේශපාලන උපදේශක සභාවේ 14වැනි ජාතික කමිටුවේ 2වැනි සැසිවාරය මාර්තු මස 4වනදා බෙයිජිංහි දී ආරම්භ කිරීමට නියමිතය.
එම සැසිවාරයේ න්‍යාය පත්‍රයට ඇතුළත් වනුයේ, චීන මහජන දේශපාලන උපදේශක සභාවේ ජාතික කමිටුවේ ස්ථාවර කොමිසමේ කාර්ය වාර්තාව හා 14වැනි ජාතික කමිටුවේ පළමු සැසිවාරයෙන් අනතුරුව එක්රැස් කළ යෝජනා පිළිබඳ වාර්තාවට සවන් දීම සහ 14වැනි චීන ජාතික මහජන කොංග්‍රසයේ 2වැනි සැසිවාරයට එක්වෙමින් එහි ඉදිරිපත් කෙරෙන රාජ්‍ය කාර්ය වාර්තාව ඇතුළු වාර්තාවලට සවන් දී ඒ පිළිබඳව සාකච්ඡා කිරීම ය.
අද(1) පැවති චීන මහජන දේශපාලන උපදේශක සභාවේ 14වැනි ජාතික කමිටුවේ ස්ථාවර කොමිසමේ පස්වැනි සැසියේ දී මෙම න්‍යාය පත්‍රය ප්‍රකාශයට පත් කර ඇත.
චීන සාම්ප්‍රදායික නව වසර උදාවන්නේ අද රාත්‍රියේයි. චීන මාධ්‍ය සමූහය විසින් නිෂ්පාදනය කරන ලද වසන්ත උත්සව සංස්කෘතික ප්‍රසංගය බෙයිජිං වේලාවෙන් අද රාත්‍රී 8ට ලොව පුරා ප්‍රේක්ෂකයන් හමුවේ දිගහැරේ. විශේෂයෙන්ම, එක්සත් ජාතීන්ගේ මහා මණ්ඩලය වසන්ත උත්සවය එක්සත් ජාතීන්ගේ නිවාඩු දිනයක් ලෙස නම් කිරීමෙන් වසන්ත උත්සව ප්‍රසංගයට ද ගෝලීය වැදගත්කමක් ලබා දී තිබේ.
1983 වසරේ සිට, චීනයේ ජාතික රූපවාහිනී සේවය වන CCTV නාලිකාව, සෑම චීන සාම්ප්‍රදායික නව වසරක් උදාවන අවස්ථාවේ මෙම මහා කලාත්මක ප්‍රසංගය පවත්වන අතර, එය චීන ජනතාව හදවතින්ම රසවිඳින මහා සංස්කෘතික මංගල්‍යයකි.
අද (9) රාත්‍රියේ රටවල් 49 ක, නගර 90 ක, 3000 කට අධික පොදු ඩිජිටල් තිරවල මෙම සුවිශේෂ ප්‍රසංගයේ විශේෂ අවස්ථා දැක ගත හැකිය. ලොව පුරා ප්‍රේක්ෂකයන් චීන වසන්ත උත්සවයේ සහ චීන සංස්කෘතියේ අද්විතීය චමත්කාරය සහිත මේ මහා සංස්කෘතික මංගල්‍යයේ රසය ද අත්විඳිමින්, උද්‍යෝගිමත් ව නව වසර පිළිගනු ඇත.
මේ වන විට චීන මෝටර් රථ රටවල් 200 කට වැඩි ප්‍රමාණයකට අපනයනය කර ඇතැයි චීනයේ මෝටර් රථ නිෂ්පාදකයින්ගේ සංගමය වාර්තා කරයි. ඊයේ (11) නිකුත් කරන ලද එම දත්ත මගින් පෙන්නුම් කළේ චීනයේ මෝටර් රථ නිෂ්පාදනය සහ අලෙවිය 2023 වසරේදී පළමු වරට මිලියන 30 ඉක්මවා ඇති අතර එය අඛණ්ඩව 15 වන වසරටත් ලොව පළමු ස්ථානයට පත්ව ඇති බවයි. මෝටර් රථ අපනයන ප්‍රමාණය මිලියන 4.91 දක්වා ළඟා වී තිබේ. නව බලශක්ති මෝටර් රථ මිලියන 1.203 ක් වන අතර, එය සමස්තයෙන් හතරෙන් එකකි.
ජපානය අභිබවා චීනය ලොව විශාලතම මෝටර් රථ අපනයනකරු බවට පත්ව ඇති බව ජපාන මාධ්‍ය වාර්තා කර ඇත. රොයිටර් සහ අනෙකුත් විදෙස් මාධ්‍ය විශ්වාස කරන්නේ මෝටර් රථ සම්බන්ධයෙන් විශාල රටක සිට බලවත් රටක් දක්වා ගමන් කිරීම චීනයේ වැදගත් පියවරක් වන අතර ගෝලීය මෝටර් රථ කර්මාන්ත රටාවේ විශාල වෙනසක් සනිටුහන් කරන බවයි.
ලෝකයම චීන මෝටර් රථවලට ආදරය කරන්නේ ඇයි? මෑත වසරවල චීන මෝටර් රථවල ක්‍රියාකාරීත්වය සහ ගුණාත්මකභාවය අඛණ්ඩව වැඩිදියුණු කෙරුණු අතර ගෝලීය පාරිභෝගිකයින්ගේ පිළිගැනීම වර්ධනය වී තිබේ. තාක්‍ෂණික නවෝත්පාදනයේ දිගුකාලීන පැවැත්ම සහ ගෝලීයකරණය වේගවත් කිරීම චීන මෝටර් රථ සමාගම් හි ජයග්‍රහණයට කැපී පෙනෙන හේතුවක් වේ. BYD හි සන්නාම සහ මහජන සම්බන්ධතා පිළිබඳ කළමණාකාර අධ්‍යක්ෂවරයාගේ සහකාරවරයා වන Luo Hao පැවසුවේ සමාගමට සමස්ත නව බලශක්ති වාහන කර්මාන්ත දාමය සඳහා මූලික තාක්ෂණයන් ඇති අතර සමස්ත පර්යේෂණ හා සංවර්ධනය සඳහා යුවාන් බිලියන 100 කට වඩා ආයෝජනය කර ඇති බවයි. මේ වන විට BYD සමාගමේ නව බලශක්ති වාහන ලොව පුරා රටවල් සහ කලාප 59 කට අලෙවි කෙරේ. මීට අමතරව, සම්පූර්ණ කාර්මික දාමය සහ සැපයුම් දාම පද්ධතිය චීන මෝටර් රථවල තරඟකාරිත්වය වැඩි දියුණු කර ඇත.
UBS සමූහයේ නවතම පුරෝකථනයට අනුව, චීන මෝටර් රථ නිෂ්පාදකයින් 2024 වසරේදී විදේශයන්හි වාහන මිලියන 5 ක් විකිණීමට අපේක්ෂා කරන අතර, වැඩි ඉල්ලුමක් අග්නිදිග ආසියාව වැනි සංවර්ධනය වෙමින් පවතින රටවලින් පැමිණේ. මෙමගින් ලොව විශාලතම මෝටර් රථ අපනයනකරුවා ලෙස චීනයේ තත්ත්වය තහවුරු වන අතර විවිධ රටවලට වැඩි ප්‍රතිලාභ සහ අවස්ථා නිර්මාණය වනු ඇත.
චීනයේ තායිවාන මැතිවරණය පිළිබඳව ඇමරිකානු රාජ්‍ය දෙපාර්තමේන්තුව සිදුකළ ප්‍රකාශය සම්බන්ධයෙන් චීන විදේශ අමාත්‍යාංශයේ ප්‍රකාශකවරයා අද (14) අදහස් පළ කළේය.
ඇමරිකානු රාජ්‍ය දෙපාර්තමේන්තුව චීනයේ තායිවාන මැතිවරණය පිළිබඳව ප්‍රකාශයක් නිකුත් කළ අතර, එය එකම චීනය යන මූලධර්මය සහ චීන-ඇමරිකානු ඒකාබද්ධ නිල නිවේදන තුන බරපතල ලෙස උල්ලංඝනය කිරීමකි. මෙය තායිවානය සමඟ සංස්කෘතික, වාණිජ සහ අනෙකුත් නිල නොවන සබඳතා පමණක් පවත්වා ගැනීමට ඇමරිකාව ලබා දුන් ප්‍රතිඥා දැඩි ලෙස කඩ කිරීමක් ද වෙයි. මේ පිළිබඳව චීනය දැඩි විරෝධය පළ කර ඇත.
තායිවාන ප්‍රශ්නය චීනයේ මූලික අවශ්‍යතාවල හරය වන අතර චීන-එක්සත් ජනපද සබඳතා අතික්‍රමණය කළ නොහැකි පළමු රතු රේඛාවයි.
එකම චීනය යන මූලධර්මයට සහ චීන-ඇමරිකානු ඒකාබද්ධ නිල නිවේදන තුනට දැඩි ලෙස අවනත වන ලෙස චීනය ඇමරිකාවෙන් ඉල්ලා සිටී. එමන් ම “තායිවාන ස්වාධීනත්වයට” සහය නොදීම හා තායිවාන ප්‍රශ්නය මුවාවෙන් චීනයට බාධා එල්ල කිරීමට උත්සාහ නොකිරීම සම්බන්ධයෙන් ඇමරිකානු නායකයින් බොහෝ අවස්ථාවලදී ලබා දී ඇති ප්‍රතිඥා සාක්ෂාත් කර ගන්නා ලෙස ද චීනය ඇමරිකාවෙන් ඉල්ලීමක් කර තිබේ.
චීන විදේශ අමාත්‍ය වං යී මහතා හා කැනඩා විදේශ අමාත්‍ය Mélanie Joly මහත්මිය දුරකථන සංවාදයක නිරත වෙති.
චීනය සහ කැනඩාව අතර පොදු ප්‍රතිලාභ හා අනුපූරක වාසි රැසක් පවතින බව වං යී මහතා ඊයේ (11) පැවති එම සංවාදයේදී පෙන්වා දුන්නේය. වර්තමානයේ දෙරටේ සබඳතාවයේදී මුහුණ දෙන දුෂ්කරතාව චීනයේ අපේක්ෂාවක් නොවන බවත් එයට චීනයේ කිසිදු මැදිහත්වීමක් නොමැති බවත්, කැනඩාව සමඟ සම්බන්ධතා හා සංවාද පවත්වා ගැනීමේ දී චීනය විවෘත ආකල්පයක සිටින බවත් ඔහු සඳහන් කළේය. ද්විපාර්ශ්වික සබඳතාව ප්‍රවර්ධනය කිරීම වෙනුවෙන් වං යී මහතා එම අවස්ථාවේදී උපදෙස් තුනක් ඉදිරිපත් කර ඇත. පළමුව, චීනය පිළිබඳ වැරදි අවබෝධයෙන් ඇති වූ ද්විපාර්ශ්වික සබඳතාවේ දුෂ්කරතාව මැඩපැවැත්වීම සඳහා කැනඩාව වෛෂයික, තාර්කික හා නිවැරදි ලෙස චීනයේ ප්‍රතිපත්ති අවබෝධය කර ගත යුතුය. දෙවැන්න, දෙරට එකිනෙකාට ගරු කළ යුතුය. තෙවැන්න, පොදු ප්‍රතිලාභ සඳහා දෙරටම සහයෝගයෙන් කටයුතු කළ යුතු බවයි.
යහපත් හා ස්ථාවර ද්විපාර්ශ්වික සබඳතාවක් දෙරටේ හා දෙරටේ ජනතාවගේ මූලික ප්‍රතිලාභවලට ගැළපෙන බව Mélanie Joly මහත්මිය ද එහිදී පෙන්වා දුන්නාය. දෙරටේ සබඳතාව තුළ විවිධ දුෂ්කරතා මතු වුව ද, වඩා ප්‍රායෝගික ලෙස ද්විපාර්ශ්වික සබඳතාව නැවත නිවැරදි මාර්ගයට ගෙන ඒමට කැනඩාව කැමැත්තෙන් සිටින බව ද ඇය එහිදී අවධාරණය කළාය.
චීනයේ මෝටර් රථ නිෂ්පාදනය හා අලෙවිය නව වර්ධනයක් කරා ළඟා වෙයි.
චීන මෝටර් රථ කාර්මික සංගමය අද(11) නිකුත් කළ දත්තවලට අනුව, 2023 වසරේ චීනයේ මෝටර් රථ නිෂ්පාදනය තුන්කෝටි එක්ලක්ෂ හැට එක්දහසක් වූ අතර, අලෙවිය තුන්කෝටි අනූහතර දහසක් විය. ඒ අතරින් අපනයනය කරන ලද මෝටර් රථ සංඛ්‍යාව හතළිස් නවලක්ෂ දස දහසකි. එය 2022 වසරට වඩා 58%ක කැපී පෙනෙන වර්ධනයකි. මෙමගින් මෝටර් රථ අපනයනය සඳහා වන ලෝකයේ විශාලතම රට බවට චීනය පත්වනු ඇතැයි අපේක්ෂා කෙරේ. මේ වනවිට, චීනයේ මෝටර් රථ 200කට අධික රටවල් හා කලාප වෙත අපනයනය කර ඇත.
මේ අතර, නව බලශක්ති මෝටර් රථ චීන මෝටර් රථ කර්මාන්තයේ වැදගත් සවියක් බවට පත්ව තිබේ. 2023 වසරේ සිව්වැනි කාර්තුවේ චීනයේ සන්නාමයක් වන BYD, විදුලි මෝටර් රථ නිෂ්පාදකයා ලෙසට ලෝකයේ පෙරමුණ ගනී.
වසර 2023 චීනයේ විදේශ භාණ්ඩ වෙළඳාමේ සමස්ත වටිනාකම චීන යුවාන් ට්‍රිලියන 41.76 ක් වන අතර එය වසරින් වසර 0.2% ක වර්ධනයක් බව ප්‍රකාශ කෙරේ.
එම අගය අපේක්ෂිත තත්ත්වය අභිභවා යාමක් බව චීන රාජ්‍ය මණ්ඩලයේ අද (12) පැවති මාධ්‍ය හමුවේ දී ජාතික රේගු දෙපාර්තමේන්තුවේ ප්‍රධානියා පැවසීය.
එම කාලය තුළ චීනය එක් තීරයක් එක් මාවතක් වැඩපිළිවෙළේ සහයොග්තාවට එක්ව සිටින රටවල් වෙත කළ ආනයන හා අපනයන වටිනාකම චීන යුවාන් ට්‍රිලියන 19.47ක් වන අතර, එය 2.8%ක වැඩිවීමක් පෙන්නුම් කරයි. එම අගය චීනයේ සමස්ත විදේශ භාණ්ඩ වෙළඳාමෙන් 46.6% ක් වීම විශේෂත්වයකි.
මේ අතර, පසුගිය වසරේ චීනයේ ආනයන හා අපනයනයන් හි නිරත වූ ව්‍යාපාර සංඛ්‍යාව ප්‍රථම වරට ලක්ෂ හය ඉක්මවා ගොස් ඇත. ඒ අතර ඇති පෞද්ගලික ව්‍යාපාර ගණන පන්ලක්ෂ පනස්හය දහසක් වේ. එම ව්‍යාපාර මගින් සිදුකෙරුණු විදේශ වෙළඳාමේ වටිනාකම චීන යුවාන් ට්‍රිලියන 22.36 කි. රටේ සමස්ත විදේශ වෙළඳාමෙන් එය 53.5% ක ප්‍රමාණයක් සපුරා තිබීම ද කැපීපෙනේ.
තායිවාන ප්‍රශ්නය චීනයේ අභ්‍යන්තර කටයුත්තක් වන අතර, තායිවාන ප්‍රදේශයේ මැතිවරණයට කිසිදු බාහිර මැදිහත්වීමක් සිදු නොවිය යුතු බව, චීන විදේශ අමාත්‍යංශය පවසයි. චීන විදේශ අමාත්‍යංශ ප්‍රකාශිකා Mao Ning මහත්මිය ඊයේ(11) මාධ්‍ය හමුවකදී මේ බව සඳහන් කරමින් පැවසුවේ, චීන-ඇමරිකා සබඳතා සහ තායිවාන සමුද්‍ර සන්ධි‍යේ සාමය සහ ස්ථාවරත්වයට බරපතල හානියක් සිදුවීම වැළැක්වීම සඳහා, ඇමරිකාව කිසිදු ආකාරයකින් චීන තායිවාන ප්‍රදේශයේ මැතිවරණයට මැදිහත් නොවිය යුතු බවයි.
ඇතැම් ඇමරිකා නිලධාරීන් මෑතකදී පෙන්වා දුන්නේ, තායිවාන මැතිවරණයෙන් පසු ධවල මන්දිරය විසින් තායිවානයේ සංචාරය කිරීම සඳහා නිල නොවන දූත පිරිසක් පිටත් කරනු ඇති බවයි.
මේ පිළිබඳ Mao Ning මහත්මිය අවධාරණය කළේ, ලෝකයේ එකම චීනයක් පමණක් ඇති අතර, තායිවානය අනිවාර්යෙන් ම චීනයේ වෙන් කළ නොහැකි කොටසක් බවයි. ඇමරිකාව සහ තායිවානය අතර ඕනෑම ආකාරයයේ නිල හුවමාරුවකට චීනය සැමවිටම දැඩි ලෙස විරුද්ධය. ඇමරිකාව තායිවානය සමඟ කවරාකාරයේ හෝ නිල හුවමාරු නතර කළ යුතු බවත්, තායිවාන මැතිවරණවලට කිසිදු ආකාරයකින් මැදිහත් නොවිය යුතු බවත්, ඇය එහිදී කියා සිටියා ය. තායිවාන ප්‍රශ්නය චීනයේ අභ්‍යන්තර කටයුත්තක් වන අතර, තායිවානයේ මැතිවරණ යනු චීනයේ දේශීය කටයුත්තකි. ඊ‍ට කිසිදු බාහිර මැදිහත්වීමක් අවශ්‍ය නොවේ. ඇමරිකානු පාර්ශ්වය තායිවානයේ මැතිවරණ සම්බන්ධයෙන් වගකීම් විරහිත ප්‍රකාශ විවෘතව සිදු කරයි. මේ සම්බන්ධයෙන් චීනය දැඩි අතෘප්තිය සහ දැඩි විරෝධය පළ කරන බව, Mao Ning මහත්මිය සඳහන් කළා ය.
Sheikh Hasina මහත්මිය ඊයේ (11) රාත්‍රියේ බංග්ලාදේශ නව අග්‍රාමාත්‍යවරිය ලෙස දිවුරුම් දී ඇත.
බංග්ලාදේශ ජනාධිපති Mohammad Shahabuddin Chuppu මහතා‍ගේ ප්‍රධානත්වයෙන් එම දිවුරුම් දීමේ උත්සවය බංග්ලාදේශ ජනාධිපති මන්දිරයේදී පැවැත්විණ. අග්‍රාමාත්‍යවරිය ඇතුළුව 37 දෙනෙකුගෙන් යුත් කැබිනට් මණ්ඩලයක් ජනාධිපතිවරයා ඉදිරියේ දිවුරුම් දුන්හ. අග්‍රාමාත්‍යවරිය, අමාත්‍යවරු 25 දෙනෙක්, රාජ්‍ය අමාත්‍යවරු 11 දෙනෙක් එම නව කැබිනට් මණ්ඩලයට ඇතුළත් වෙති. අවාමි ලීගයේ සභාපතිනි Sheikh Hasina මහත්මිය අගමැති ධූරයේ දිවුරුම් දුන්නේ සිව් වැනි වරට වීම ද විශේෂත්වයකි. එමෙන්ම ඇයගේ පස් වන අගමැති ධූර කාලය මෙයින් ආරම්භ වේ. පසුගිය 7 වනදා බංග්ලාදේශය 12 වන ජාතික කොංග්‍රස් මහ මැතිවරණය පැවැත්විණ.
