By Admin 
Published on: Jan 15, 2019-(මෙම ලිපිය 2019 ජනවාරි 15 දින පලකරන ලද්දකි.නමුත් එය තවමත් වලංගුය…)
ගෝඨාභය රාජපක්ෂ මහතා ඉදිරි ජනාධිපතිවරණයට ඉදිරිපත් වේදැයි මම නොදනිමි. දැනට තිබෙන ජනසංයුතිකයන්ට අනුව ඔහුට ඉදිරිපත් වී එය ජයග්‍රහණය කිරීමට හැකියාවක් ඇතිදැයි ද මම නොදනිමි. එහෙත් එක් දෙයක් මම දනිමි. එනම් ගෝඨාභය මහතා ව ප්‍රවර්ධනය කරන ජනතීරුව දෙස බලන විට ජනපතිවරණය ජයගත්ත ද එම ජයග්‍රහණය වැඩි කල් නඩත්තු කිරීමට නම් නොහැකි වනු ඇත. මන්ද අප රටට ඉදිරියේ දී අවශ්‍ය වන්නේ පාලකයෙකු නොව, ලංකාවේ සියළු ජන කොටස්, ආර්ථිකය, දේශපාලනය ආදි සකලවිධ අංග මනාව කළමනාකරණය කළ හැකි දක්ෂ කළමනාකරුවෙකු නිසා ය.
අර්බුදය ඔඩු දුවන්නේ ගෝඨාභය මහතාගේ ගැටළුවක් නිසා නොවන බව ද කියමි. එහෙත්, ඔහු ව ඉල්ලන පිරිසෙහි දේශපාලන හා වාර්ගික අභිලාෂයන් නිසා ය. අප සැම ඉතා හොඳින් දන්නා පරිදි ලෝක දේශපාලනය හා ඒ ඒ රටවල යහපැවැත්ම වත්මන වන විට එක් පද්ධතියයක් ලෙස ඉතා තදින් එකිනෙකට බැඳී ඇති දාමයකි. අප වන් කුඩා රටකට මතු නොව කනම් රටකට හෝ ඉන් පහසුවෙන් මිදිය නොහැකි ය. අප කැමති වුවද අකමැති වුව ද ලෝකය අප දෙසට දක්වන ප්‍රතිචාරය රඳා පවතින්නේ අප රටේ සියළු ජනකොටස් හා ඒ ආශ්‍රිත ප්‍රශ්න කිසිවෙකුට ගැටළුවක් නොවන ලෙස කළමනාකරණය කරන ආකාරය මතය. ගෝඨාභය මහතා වෙනුවෙන් පෙනී සිටින පිරිස මෙවැනි කළමනාකරණයකට කිසිදා යෑමට ඔහුට ඉඩ නොදෙනු ඇත.
ගැටළුව වන්නේ ගෝඨාභය මහතාට එක්කෝ තමා ගැන උද්වේගකර අපේක්ෂා සහිත නාගරික සිංහල බෞද්ධ තීරුවේ අන්තවාදි අභිලාෂ සංතර්පනය කිරීමට සිදුවීම ය. නැතිනම් එම අන්තවාදී කොටස් ඉච්ඡාභංගත්වයට පත් කරමින්, සියළු ජනකොටස් එකට සංතර්පනය වන ක්‍රියාමාර්ගයකට අවතීර්ණ වීම ය. මුල් එළඹුමේ දී දෙවැන්න අසතුටු වනු ඇත. දෙවැන්නට ගියහොත් අංක එක අසතුටු වනු ඇත. ඉතිරි වන්නේ, මග හිටියොත් නසී, ගෙදර ගියොත් අඹු නසී තත්වයකි.
සුළු ජන කළමනාකරණය නොවුවහොත්, විශේෂයෙන් උතුරේ දෙමළ ජනයා වෙත තවදුරටත් පීඩනය එල්ල වන පසුබිමක, රටපුරා මුස්ලිම් ජනයා වෙත ද භීතිය පැතිරුණ හොත් එම සුළුජන වර්ග හා ආගමික කොටස් ඉතා ඉක්මනින් එම පාලනයෙන් කලකිරීමට පත්වීම අමුතුවෙන් කිවයුතු නොවන්නකි. එවිට ඇති වීමට නියමිත තත්වය 2014 අගභාගයේ සිදු වූවක් වැනි ය. එසේ වුවහොත්, ජාත්‍යන්තර අතපෙවීම් හා ආර්ථික සම්බාධක හමුවේ රට තවදුරටත් අර්බුදකාරි දිශාවකට ම ගමන් කරනු ඇත. එවන් තත්වයක අනිවාර්ය ප්‍රතිඵලය වන්නේ පොදුජන ආර්ථික අපහසුතා මැද ජාති, වර්ග හෝ කල්ලි භේදයකින් තොරව සියළු පුරවැසියා පාලනය කෙරෙහි කලකිරීම ය. එතුළ, ගෝඨාභය මහතා ජයග්‍රහණය කරවීම තුළින් සිංහල අන්තවාදී මැදපන්තිය ඉල්ලූ අභිලාෂ ද පොදුවේ රට ඉල්ලන අභිලාෂ ද අහිමි ව යනු ඇති අතර, රනිල් වැනි බටහිරට හා දෙමළ ජාතිවාදයට ගැති පුද්ගලයෙකුගේ පුනරාගමනය යළි පරජය කරනු නොහැකි ලෙස ඉස්මතු වනු ඇත.
විශේෂ ලියුම්කරු
LNNADMIN