Published on: Jan 26, 2018 – බැඳුම්කර වාර්තාව ඉදිරියට දමමින් මෛත්‍රීපාල සිරිසේන ජනාධිපතිවරයා එජාප නායකය ඇතුලු එක්සත් ජාතික පක්ෂයට දිගින් දිගටම පහරදිම හේතුවෙන් එහි වාසිය හිටපු ජනාධිපති මහින්ද රාජපක්ෂ මහතා ප්‍රධාන ශ්‍රී ලංකා පොදු ජන පෙරමුණට අත් වෙමින් පවතින බව රාජ්‍ය බුද්ධි අංශ වාර්තා අනාවරණය කර තිබේ.
බුද්ධි අංශ සමීක්ෂණ වාර්තා පෙන්වා දෙන්නේ මේ හේතුවෙන් පළාත් පාලන මැතිවරණයට අදාළව ශ්‍රී ලංකා නිදහස් පක්ෂයේ ඡන්ද පදනම 20 % දක්වාද එක්සත් ජාතික පක්ෂයේ ඡන්ද පදනම 38 % දක්වාද අඩු වී තිබෙන අතර ශ්‍රී ලංකා පොදු ජන පෙරමුණේ ඡන්ද පදනම 31 % දක්වාද ජනතා විමුක්ති පෙරමුණේ ඡන්ද පදනම 08 %දක්වාද වැඩි වී තිබෙන බවය.
මේ අතර මේ පළාත් පාලන මැතිවරණයේ දී පාවෙන ඡන්ද සහ අලුත් ඡන්ද දිනා ගැනීමේ වැඩි ශාක්‍යතාවය විපක්ෂයට පවතින අතර ඊට හේතු වී තිබෙන්නේ එක්සත් ජාතික පක්ෂයට සහ ශ්‍රී ලංකා නිදහස් පක්ෂයට පොදුවේ ඒක හඬක් නොතිබීම සහ එකිනෙකා ඉලක්ක කර ගෙන ක්‍රියා කිරීම හැරුණු කොට සමස්ථ විපක්ෂයට බරපතළ ප්‍රහාරයක් එල්ල කිරීමට අසමත්ව සිටීම ආදී කරුණු බව ද බුද්ධි අංශ නිරීක්ෂණය කර ඇත.
එමෙන්ම දේශපාලන විචාරකයන් පෙන්වා දෙන්නේ ජනාධිපතිවරයා ප්‍රධාන ශ්‍රී ලංකා නිදහස් පක්ෂය අගමැතිවරයා ප්‍රධාන එක්සත් ජාතික පක්ෂය කෙරෙහි ප්‍රහාරාත්මක ස්ථාවරයක සිටිමින් කටයුතු කළත් අගමැතිවරයාගෙන් සහ එම පක්ෂයෙන් ප්‍රතිප්‍රහාර එල්ල නොවන තත්ත්වය හමුවේ එක්සත් ජාතික පාක්ෂිකයින් අතර කලකිරිමක් ඇතිවි ඇති බවයි.
