හේමරතන ලග නීතිපති දෙපාර්තමේන්තුව නැවෙයි! බරපතළ අපරාධ සැකකරුවෙකුට “සුපිරි ප්‍රභූ” සැලකිලි! නීතිය යන්නේ මොන පාරේද?

බලගතු භික්ෂුවක් සම්බන්ධ ළමා අපයෝජන සිද්ධිය මෙහෙයවීමේදී පොලිසිය දැක්වූ පක්ෂපාතීත්වය සහ පද්ධතිමය අසාධාරණය “දිනන දකුණ” සාමූහිකය දැඩිසේ හෙළා දකිම් නිවේදනයක් නිකුත් කර තිබේ. එම නිවේදනය මගින් පෙන්වා දි ඇත්තේ 2026 මැයි 22 දින අනුරාධපුර මහේස්ත්‍රාත් අධිකරණ පරිශ්‍රයේදී සිදු වූ සිදුවීම්වලින් අපේ රටේ නීතිය ක්‍රියාත්මක වීමේදී පවතින පිළිකුල්සහගත ද්විත්ව ප්‍රමිතිය මැනවින් නිරාවරණය වන බවයි.

අටමස්ථානාධිපති පල්ලේගම හේමරතන හිමියන්ට එරෙහිව එල්ල වී ඇති බරපතළ ව්‍යවස්ථාපිත ස්ත්‍රී දූෂණ සහ බාලවයස්කාර ළමා ලිංගික අපයෝජන චෝදනා සම්බන්ධයෙන් ශ්‍රී ලංකා පොලිසිය ඇතුළු රාජ්‍ය යාන්ත්‍රණය කටයුතු කර ඇති අතිශය පක්ෂපාතී සහ දෝෂ සහිත ආකාරය පිළිබඳව අපි අපගේ දැඩි පිළිකුල සහ බරපතළ විරෝධය මෙසේ ප්‍රකාශ කර සිටිමු.

2026 මැයි 22 දින අනුරාධපුර මහේස්ත්‍රාත් අධිකරණ පරිශ්‍රයේදී සිදු වූ සිදුවීම්වලින් අපේ රටේ නීතිය ක්‍රියාත්මක වීමේදී පවතින පිළිකුල්සහගත ද්විත්ව ප්‍රමිතිය මැනවින් නිරාවරණය වේ.

ඉන් පැහැදිලි වන්නේ මෙරට ධනවත්, දේශපාලනිකව බලවත් සහ ආගමික වශයෙන් ඉහළ තලයක සිටින ප්‍රභූන් ආරක්ෂා කිරීම සඳහා රටේ නීතිය සිතාමතාම නවන අතර, අසරණ වින්දිතයන්ගේ අයිතිවාසිකම් ක්‍රමානුකූලව කුණු කූඩයට දමන බවයි.

වින්දිත බාලවයස්කාර දැරියට යුක්තිය ඉටුකිරීමේදී සහ නීතියේ සමාන රැකවරණය ලබාදීමේදී සිදුකර ඇති පහත සඳහන් බරපතල උල්ලංඝනයන් කෙරෙහි අපි වහාම සමාජ අවධානය යොමු කරමු.

1. බරපතළ අපරාධ සැකකරුවෙකුට “සුපිරි ප්‍රභූ” සැලකිලි දැක්වීම:

සාමාන්‍ය සැකකරුවන්ට බරපතල අපරාධ චෝදනා එල්ල වූ විට ඔවුන්ව දැඩි රැඳවුම් රෙගුලාසිවලට යටත් කරන මුත්, මෙම සැකකරු පොලිස් ජීප් රථ දෙකක පෙරගමන් ආරක්ෂාව සහිතව අතිශය සුඛෝපභෝගී වෑන් රථයකින් අධිකරණය වෙත කැඳවාගෙන එන ලද බව අප නිරීක්ෂණය කරන්නෙමු.

තවද, මාධ්‍යවේදීන්ට සිය රාජකාරිය කිරීමට ඉඩ නොතබා මුළු මාර්ගයම අවහිර කරමින් පොලිසිය සැකකරු ආවරණය කිරීමට කටයුතු කොට තිබුණු බව ද අප නිරීක්ෂණය කර සිටිමු.

මෙයින් පෙනී යන්නේ පොලිසිය අපරාධ නීතිය අපක්ෂපාතීව ක්‍රියාත්මක කරනවා වෙනුවට බලගතු පුද්ගලයෙකුගේ පෞද්ගලික ආරක්ෂකයන් ලෙස කටයුතු කර ඇති බවයි.

2. විමර්ශන සිතාමතාම ප්‍රමාද කිරීම සහ යටගැසීමට තැත් කිරීම:

තමන් මුහුණ දුන් බරපතළ අතවරය සම්බන්ධයෙන් වින්දිත දැරිය විසින් ප්‍රථම වරට අප්‍රේල් 10 වනදා පොලිසියට ඉතා පැහැදිලි ප්‍රකාශයක් ලබා දී තිබුණ ද, පොලිසිය මෙම තොරතුරු ජාතික ළමාරක්ෂක අධිකාරියෙන් (NCPA) සිතාමතාම සඟවා තබා ගත් බව පෙනෙන්නට තිබේ. අප්‍රේල් 22 වනදා ස්වාධීන මාධ්‍යවේදියෙකු සෘජුවම පැමිණිල්ලක් ඉදිරිපත් කරන තෙක් සති දෙකකට ආසන්න කාලයක් කිසිදු පියවරක් නොගෙන සිටි බව ද අප නිරීක්ෂණය කර සිටිමු. මෙම සිතාමතා සිදුකළ ප්‍රමාදය පිටුපස ආයතනික අනුග්‍රහයක් පවතින බව පැහැදිලිවම පෙනෙන්නට තිබේ.

3. ඥාති සංග්‍රහය සහ රාජ්‍ය බලය අවභාවිත කිරීම:

මහජන ආරක්ෂක අමාත්‍යාංශයේ ලේකම්වරයා සහ මෙම සැකකාර හිමියන් අතර සමීප ඥාති සබඳතාවක් පවතින බවට තොරතුරු අනාවරණය වීමෙන් සමස්ත පරීක්ෂණයේ විනිවිදභාවය බරපතළ ලෙස අභියෝගයට ලක්ව තිබේ.

සැකකරු සම්බන්ධයෙන් මුල සිටම මෘදු ප්‍රතිපත්තියක් අනුගමනය කිරීම, රිමාන්ඩ් බන්ධනාගාරගත කිරීම මඟහැරීමට පෞද්ගලික රෝහල්වල සුඛෝපභෝගී ලෙස රැඳී සිටීමට ඉඩ හැරීම සහ අවසානයේ ඇප ලබාදීමට පොලිසිය දැඩි ලෙස විරුද්ධ නොවීම පිටුපස මෙම පාලන හා රාජ්‍ය බලපෑම් මෙන්ම ඥාති සංග්‍රහය පවතින බවට පැහැදිලි සේයාවක් මතු වේ.

4. නීතිපති දෙපාර්තමේන්තුව වගකීමෙන් බැහැර වීම:

මෙම තීරණාත්මක ඇප විභාගය සඳහා තමන්ට නීතිඥ සහාය ලබාදෙන ලෙස පොලිසිය සහ ජාතික ළමාරක්ෂක අධිකාරිය යන දෙපාර්ශ්වයම නීතිපතිවරයාගෙන් ලිඛිතව ඉල්ලා තිබුණි. එසේ වුව ද, නීතිපති දෙපාර්තමේන්තුව වින්දිත දැරිය වෙනුවෙන් පෙනී සිටීමට කිසිදු නීතිඥ සහායක් ලබා දී නැති බව පෙනෙන්නට තිබේ. මෙම ආයතනික මඟහැරීම හේතුවෙන්, සැකකරු වෙනුවෙන් ඉදිරිපත් වූ 36කට ආසන්න නීතිඥ බලඇණියක් හමුවේ අසරණ දරුවා කිසිදු රාජ්‍ය නීතිමය රැකවරණයක් නොමැතිව තනි වූ බව පෙනෙන්නට තිබේ.

ශ්‍රී ලංකා ආණ්ඩුක්‍රම ව්‍යවස්ථාව මඟින් නීතිය ඉදිරියේ සැමදෙනාම සමාන බවත්, නීතියේ සමාන රැකවරණය ලැබීමට සැමට අයිතියක් ඇති බවත් සහතික කර ඇත. තමන් වෙනුවෙන් හඬක් නැගීමට වත් වත්කමක් නැති, දිනකට එක වේලක් පවා සපයා ගැනීමට අපහසු අන්ත අසරණ පවුලක දරුවෙකුගේ මානසික හා නීතිමය සුභසිද්ධිය පසෙකලා, සිවුරේ බලයට සහ ඉහළ රාජ්‍ය නිලතලවල බලයට ප්‍රමුඛතාව දීමෙන් පොලිස් දෙපාර්තමේන්තුව වින්දිතයාගේ මූලික අයිතිවාසිකම් බරපතළ ලෙස උල්ලංඝනය කර ඇති බව අප සාමුහිකය ප්‍රකාශ කර සිටී.

මෙම සමස්ත ක්‍රියාවලිය තුළ මහජන විශ්වාසය සහමුලින්ම පාවා දී තිබේ.

රාජ්‍යයේ කිසිදු නීතිමය සහයක් නොලැබුණු පසුබිමක, විවෘත අධිකරණය තුළ වින්දිත දැරිය වෙනුවෙන් දැඩි වේදනාවෙන් සහ කඳුළින් යුතුව කරුණු දැක්වූ ජාතික ළමාරක්ෂක අධිකාරියේ (NCPA) නීති ක්‍රියාත්මක කිරීමේ අංශයේ නීතිඥවරිය ඇතුළු නිලධාරීන් කණ්ඩායම ගත් නිර්භීත ස්ථාවරය අපි ඇගයීමට ලක් කරමු.

අපි ජනාධිපතිවරයාගෙන්, අධිකරණ අමාත්‍යවරයාගෙන් සහ ජාතික පොලිස් කොමිෂන් සභාවෙන් වහාම ක්‍රියාත්මක වන පරිදි මෙසේ ඉල්ලා සිටිමු:

* මෙම විමර්ශනයට බාධා කිරීම සඳහා තමන්ගේ පවුල් සබඳතා සහ තනතුරු අවභාවිත කළ බවට සැක කෙරෙන සියලුම ඉහළ නිලධාරීන්ට එරෙහිව පරීක්ෂණයක් පවත්වන ලෙස අප සාමුහිකය වත්මන් රජයට බලකර සිටී.

* එසේම මෙම සිද්ධිය මුල් අවස්ථාවේදීම යටගැසීමට කටයුතු කළ ගම්පහ සහ නිට්ටඹුව පොලිස් කාන්තා කාර්යාංශයන්හි හැසිරීම පිළිබඳව වහාම ස්වාධීන පරීක්ෂණයක් ආරම්භ කළ යුතුව තිබේ.

* සැකකරු සතු අතිවිශාල සමාජයීය, ආර්ථික සහ ආගමික බලපෑම් හමුවේ වින්දිත දැරියට සහ ඇයගේ මවට උපරිම සාක්ෂිකරුවන් ආරක්ෂා කිරීමේ රැකවරණය සහතික කිරීම මෙම සන්දර්භය තුළ අනිවාර්ය අවශ්‍යතාවක්ව තිබේ.

යම් සමාජයක අපරාධ චෝදනා ලත් පුද්ගලයා බලගතු ආගමික ස්ථානයක වැජඹෙන නිසාම, අතවරයට ලක්වූ අසරණ බාලවයස්කාර දරුවෙකුට නීතියේ සමාන රැකවරණය, සමාන ගරුත්වය සහ යුක්තිය ඉටුකිරීමේ සමාන අවස්ථාව ලබා දීමට අපොහොසත් වන්නේ නම්, මේ රටේ පවතින “නීතියේ ආධිපත්‍යය” සම්පූර්ණ ප්‍රහසනයකි.

අප සාමුහිකය මෙම සමස්ත ක්‍රියාවලිය දිගහැරෙන ආකාරය පිළිබඳව නිරන්තර අවධානයෙන් පසුවන අතර, එහිදී කිසිදු බලපෑමකට යටත් නොවන සැබෑ යුක්තිය ඉටු වන තෙක් අපගේ හඬ නතර නොකරමු.

එසේම මෙරට වෙසෙන සැබෑ බෞද්ධ ජනතාවගෙන් ඉල්ලා සිටින්නේ රටක යුක්තිය ඉටු කිරීම සඳහා පෙරට එන ලෙසත්, බෞද්ධකමේ මුවාවෙන් අපරාධයක් සිදුකළේ යැයි චෝදනා ලැබ සිටින චුදිතයෙකුට එරෙහිව යුක්තිය පසඳලීමේ ක්‍රියාවලියට බෞද්ධකම පලිහක් ලෙස යොදා ගැනීමට අවස්ථාවාදීන්ට ඉඩ ලබා දීමෙන් වළකින ලෙසත්ය.

දිනන දකුණ සාමූහිකය වෙනුවෙන්,
නායකත්ව මණ්ඩලය හා විධායක සභාව.